27 Ыам ыйа 27.05
  • -7°
  • $ 104,68
  • 115,6

Ил Дархан Айсен Николаев Билии күнүнэн эҕэрдэлиир

10:01, 01 сентября 2020
Текст:

Ытыктабыллаах Саха сирин олохтоохторо! Саха Өрөспүүбүлүкэтин салалтатын аатыттан уонна тус бэйэм эһигини Билии күнүнэн эҕэрдэлиибин!


Балаҕан ыйын 1 күнэ – үгүс көлүөнэни саҥаны айарга уонна үтүө саҕалааһыҥҥа кынаттыыр биир саамай үөрүүлээх, умнуллубат бырааһынньык. Улахан дьоҥҥо оскуолатааҕы сылларын, устудьуоннаабыт кэмнэрин санатар дьикти иэйиилээх күн. Бүгүн биһиги бастакы кылааска киирэр оҕолору уонна кинилэр төрөппүттэрин итиитик-истиҥник эҕэрдэлиибит, алгыс тылы этэбит. Быйыл өрөспүүбүлүкэ үрдүнэн 15 285 оҕо оскуола боруогун аан маҥнай атыллыаҕа. Кинилэр билии киэҥ суолугар үктэммиттэрин биллэрэн бастакы чуораан чугдаарыа. Саҥа үөрэх дьыла саҕаламмыт кэрэ-бэлиэ күнүгэр 154 тыһыынча үөрэнээччи доҕотторун, учууталларын кытта көрсүөҕэ. Бу үөрэх дьыла оскуоланы бүтэрэр оҕолорго идэлэрин талалларыгар дьоһун суолталаах буолуоҕа.

48 тыһыынчаттан тахса устудьуон Саха сирин үрдүк уонна орто анал үөрэх тэрилтэлэригэр үөрэниэҕэ. Кинилэргэ ис кыахтарын арыйан, идэни баһылыыр үөрүйэхтэри мунньунар кэмнэрэ саҕаланар.

Биһиги үөрэнээччилэрбит, педагогтарбыт, төрөппүттэрбит дьаҥ өрө турбут кэмигэр онлайн-үөрэххэ көһөн, эппиэтинэстээхтэрин, дьулуурдаахтарын көрдөрөн, ааспыт үөрэх дьылын этэҥҥэ түмүктээтилэр. Уустук усулуобуйаҕа дьоһун уопуту мунньуннулар, онно олоҕуран үөрэх үгэс буолбут көрүҥүн тэҥэ дистанционнай үөрэҕи сайыннарыахтара. Бу быстах кэмнээх ыарахаттары биһиги этэҥҥэ туоруохпут, дьаныардаах үөрэххит уонна үлэҕит ситиһиилэниэхтэрэ диэн эрэнэбин. Өрөспүүбүлүкэҕэ бары өттүнэн дэгиттэр сайдыылаах киһини үөрэтии уонна иитии хаачыстыбатын үрдэтиигэ, аныгы ирдэбилгэ эппиэттиир үөрэх инфраструктуратын сайыннарыыга туһуламмыт кэлим үлэ салҕанар. Биһиги оҕоҕо, ханна олороруттан тутулуга суох, үөрэҕин саҕалыырыгар биир тэҥ усулуобуйаны хааччыйыах тустаахпыт.

Быйыл Наука аччыгый академията уонна Арктика норуоттар икки ардыларынааҕы оскуолата ааннарын арыйыахтара. Улуустарга уонна куораттарга Үүнүү-сайдыы кииннэрэ тэриллэллэр. Саха сирин Россия 15 бастыҥ регионун ахсааныгар киллэрэр сорук турар. Оччоҕо хас биирдии оҕо үөрэҕи баһылаан, өрөспүүбүлүкэтин уонна дойдутун туһугар таһаарыылаахтык үлэлээн-хамсаан, олох бары эйгэтигэр күрэстэһэр кыахтаныаҕа.

Күндү доҕоттор, бу сырдык үтүө күн барыгытыгар үлэҕэ уонна үөрэххэ ситиһиилэри, кэрэхсэбиллээх уларыйыылары, чаҕылхай түгэннэри, чэгиэн доруобуйаны уонна дьолу баҕарабын!

Саха Өрөспүүбүлүкэтин Ил Дархана Айсен Николаев

Следите за самым важным и интересным в Telegram-канале и WhatsApp-группе ЯСИА
0
0