13 Атырдьах ыйа 13.08
  • 16°
  • $ 60,9
  • 62,54

Идэһэлэнии национальнай көрүҥүн туһунан сокуон барылын бэлэмнииллэр

Саха сиригэр сүөһүнү өлөрүү (идэһэлэнии) национальнай көрүҥүн туһунан сокуон барылын бэлэмнииллэр. Сокуон ылыллар түгэнигэр сылгыны сиргэ (сылгы базаларыгар) өлөрүөххэ сөп буолуо.


Тыа хаһаайыстыбатын миниистирин солбуйааччы Василий Афанасьев быһаарбытынан, таможеннай сойуус тэхиниичэскэй регламена, бэтэринээринэй сертификация электроннай систиэмэтэ олоххо киириэҕиттэн, бэтэринээринэй докумуон «Меркурий» бырагыраама нөҥүө электронно оҥоһуллар. Итинэн сиэттэрэн сүөһүнү сиргэ (сылгы базаларыгар) өлөрөр бобуллар, анал өлөрөр пууҥҥа дьаһайыллыахтаах.

«Россельхознадзоры уонна бэтэринээринэй департамены кытары сүбэлэһии кэннэ хас биирдии нэһилиэк сүөһүнү өлөрөр пуунугар эти «Цербер» систиэмэтигэр регистрациялыах буоллубут. Ити табаары салгыы «Меркурий» систиэмэтинэн кэтииргэ наадалаах. Сүөһүнү өлөрөр пууннар боростой тутуулаах буолуохтара», — диэтэ миниистири солбуйааччы.

Тыа хаһаайыстыбатын министиэристибэтэ итиэннэ Ил Түмэн дьокутааттара сокуону ылыннахтарына, сылгыны сылгы базаларыгар өлөрөр кыах үөскүө.

«Биһиги сүөһү өлөр кэмигэр таһырдьа -30 кыраадыс буолан сыстыганнаах ыарыылар тарҕанар кыахтара суоҕун, хаар халыҥа сүөһү этэ сиргэ-буорга сыстыбатын хааччыйарын билим бэрэстэбиитэллэригэр дакаастыахтаахпыт. Сүөһүнү өлөрүү тэхиниичэскэй регламент ирдэбиллэригэр бары өттүнэн эппиэттэһэр, онон сокуон ылыллан, эһиил олоххо киириэн баҕарабыт», — диир Афанасьев.

Следите за самым важным и интересным в Telegram-канале и WhatsApp-группе ЯСИА
0
0