Өрөспүүбүлүкэ бастакы вице-премьера Алексей Стручков Мэҥэ Хаҥалас улууһун Хаптаҕайыгар сырытта. Тыа хаһаайыстыбатын салаатын үлэтин көрдө-билистэ. Кини кыра нэһилиэнньэлээх сэлиэнньэ өрө тахсарыгар хас да боппуруоһу көтөхтө.
Алексей Стручков, бастатан туран, Хаптаҕайдааҕы уотурба собуотун үлэтин туругун билистэ. Тэрилтэ 2017 сылтан үлэлиир уонна билигин банкроттуур кыһалҕаҕа киирбит. Ити эрээри олохтоох дьаһалта тэрилтэ салгыы үлэлииригэр интэриэстээх.
«Туймаада» ФАПК генеральнай дириэктэрин солбуйааччы Михаил Миронов эппитинэн, собуоту быыһыырга улахан уларытыылар киириэхтэрин наада. Оччотугар бэйэ бурдугун оҥорон таһаарыы, саҥа оборудованиены, техниканы ылыы уонна үлэ миэстэтин баарынан хаалларыы боппуруостара быһаарыллыахтаахтар.
«Барыллааһын быһыытынан собуот үлэлиир кыамтатын кыччатан, босхоломмут күүһү технологияны саҥардыыга ыытар сорук турар. Ити 10 ыйга 3000 туонна үрдүк хаачыстыбалаах бурдугу оҥорон таһаарыыга тириэрдиэн сөп. Ити эрээри бу биир эрэ кыһалҕаны быһаарар. Үлэнэн хааччыйыы бэбиэскэҕэ туран хаалар. Саҥардыы 10 эрэ киһи үлэлииригэр ананар. Оччотугар 40 киһи үлэтэ суох хааларыгар тиийэр. Ол иһин бу собуот сиригэр-уотугар оҥорон таһаарар кластер тэрийэри этэбин. Өрөспүүбүлүкэ сайдыытыгар үлэлиир институттары барыларын кыттыһыннаран туран», — диэтэ Миронов.
Стручков этиини кытта сөбүлэстэ уонна баар кыһалҕалары учуоттаан туран саҥардыы хайаан да ыытыллыахтааҕын эттэ. Кини тыа хаһаайыстыбатын министиэристибэтигэр ыйыылары биэрдэ — бастакы кыбаарталга бизнес-былааны уонна экэнэмиичэскэй бигэргэтиини оҥороллоругар.
