От ыйын 21-25 күннэригэр Хаҥалас улууһугар Орто Дойду комплекска Уһук Илин регионнааҕы «Хотугу Синергия» ыччат форума ыытыллара күүтүллэр.
Бу форум «Сахаселигер» ыччат форумун утумнааччытынан буоларын туһунан суруналыыстары кытары көрсүһүү кэмигэр иһитиннэрдилэр. Ол курдук СӨ Ыччатын министиэристибэтин көҕүлээһининэн ыытыллар «Сахаселигер», «Миниистир», «Эдэр фермер» форумнар кэннилэриттэн үгүс бырайыак олоххо киирдэ. Маннык тэрээһиннэргэ бастыҥтан бастыҥнар кытталлар.
Оттон быйыл бастакытын ыытыллар «Хотугу Синергия» форум алта хайысханан, ол иһигэр «ПРО Якутии: школа молодого лидера» (салайааччы Галина Тен), «Я – инженер» (салайааччы Владимир Аммосов), «Ты — предприниматель» (салайааччы Тимур Ханды), «Студенческое самоуправление» (салайааччы Василий Попов), «Рабочая молодежь» салайааччы Светлана Павлова), «Мир кино» (салайааччы Дмитрий Шадрин) ыытыллыаҕа.
Уһук Илин регионнааҕы таһымнаах тэрээһиҥҥэ кыттыан баҕалаахтар «Молодежь России» автоматизированнай информационнай ситимҥэ киирэн регистрацияланан, номнуо 170 кыттааччы талыллыбыт. Мантан 38-һа «Я — инженер» Уһук Илин регионнааҕы куонкурус бастакы түһүмэҕин кыайыылаахтара итиэннэ 36-та Үлэни тэрийиигэ норуоттар икки ардыларынааҕы профсойуустар форумнарын кыттыылаахтара. Хас биирдии хайысхаларынан анал экспертэр ыҥырыллан үлэлиэхтэрэ.
Форум чэрчитинэн, бастыҥ үлэлээх бырайыактарга граннар көрүллүөхтэрэ. Грант уопсай суумата 2 мөл. солк. Маны таһынан кыттааччылар СӨ бырабыыталыстыбатын чилиэннэрин кытары көрсүөхтэрэ.
