Ааспыт сыл устата Россия урбаан эйгэтигэр Российскай Федерация атыы-эргиэн палаататын иһинэн ыытыллар “Успешная семья – Успешная Россия” хаһыс да төгүлүн ыытыллар форум чэрчитинэн “Надежды Бизнеса России” бырайыакка Саха сириттэн Үөһээ Бүлүү улууһун оҕолоро, Д.С.Спиридонов аатынан 4 нүөмэрдээх орто оскуола үөрэнээччилэрэ Сулустаан уонна Санаайа Антоновтар көхтөөхтүк кыттан, бириистээх 2 миэстэни ылар чиэскэ тигистилэр.
Кинилэр төрөппүттэрэ Стелла уонна Александр Антоновтар эмиэ ааспыт сыл устата “Семейные компании России-2023» бырайыакка бэйэлэрин үлэлэрин көрдөрбүттэрэ, уопут атастаспыттара.
Былырыын Москуба куоракка ГосДумаҕа Антоновтар дьиэ кэргэн династиятын хаартыската быыстапкаҕа турбута. Онтон оҕолоро “Надежды бизнеса России” бырайыакка ситиһиилээхтик кыттыбыттара. Бырайыак чэрчитинэн, дьиэ кэргэн бизнеһин туһунан видео-клип, слайд, урбаанньыт, экономика боппуруостарыгар о.д.а араас интэриэһинэй вебинардарга үөрэнэн элбэҕи биллилэр.
«Бырааппынаан бу бырайыакка кыттан элбэххэ үөрэннибит. Ол курдук, Үөһээ Бүлүүгэ олохсуйбут Баай Батаакап историятын туһунан кэпсээммит дьүүллүүр сүбэ сэҥээриитин ылбыппыт, маны тэҥэ биисинэс хайдах барыахтааҕын, клиеннары кытта үлэлээһин о.д.а. боппуруостарга тоҕоостоох эппиэттэри булан үөрэннибит. Үлэбит түмүктэриттэн олус астынныбыт. Инникитин да маннык киэҥ хабааннаах күрэхтэргэ, бырайыактарга кытта туруохпут, үүнүөхпүт-сайдыахпыт!»- диэн санаатын үллэһиннэ Санаайа Антонова.
«Быйылгы дьыл Россияҕа дьиэ кэргэн сыла биллэриллибитэ . Ол курдук, форуммут түмүгэ дьиэ кэргэн сылыгар, урбаан күнүгэр сөп түбэһиннэрэн ыам ыйын 28 күнүгэр Москва куоракка конгресс-кииҥҥэ үрдүк таһымнаахтык буолан ааста. Биһиги Антоновтар дьиэ кэргэн форуму быһа эфирынан тахсан көрдүбүт-иһиттибит. Манна РФ торговай-промышленнай палата Президенэ Сергей Катырин, РФ Государственнай Федеральнай Мунньаҕын Бэрэссэдээтэлин солбуйааччыта Анна Кузнецова, РФ социальнай харалта уонна үлэтин I солбуйааччыта Ольга Баталина, РФ торговай-промышленнай палататын вице-президенэ Елена Дыбова, Дьиэ кэргэни көмүскүүр комитетын бэрэссэдээтэлин I солбуйааччыта Татьяна Буцкая уо.д.а. форум кыттыылаахтарыгар анаан эҕэрдэ тыл эттилэр. Бу кэнниттэн бырайыак кыттыылаахтарыгар финансовый ребус таайыы күрэҕэр биһиги оҕолорбут бэлиэтэннилэр.
Бу улахан таһымнаах бырайыак түмүгүнэн, 33 регионтан биһиги оҕолорбут 2 миэстэҕэ тахсан үөрүүбүт үксээтэ. Киэҥ хабааннаах форумна кыттарбытыгар күүс-көмө, сүбэ-ама биэрбит Саха сиринээҕи торговай-промышленнай палата Президенигэр Марина Богословскаяҕа, кураторбытыгар Зоя Даниловнаҕа улахан махталбытын тиэрдэбит. Эһиги көмөҕүтүнэн-сүбэҕитинэн бу бырайыакка биһиги оҕолорбутугар саҥа сүүрээни киллэрдибит», — диэн кэпсээтэ оҕолор ийэлэрэ Стелла Антонова.
СИА
