Дьокуускай баһылыга Дмитрий Садовников Дьокуускай куорат Дууматын бэрэссэдээтэлэ Альберт Семеновы, Дьокуускай куорат Дууматын бэрэссэдээтэлин бастакы солбуйааччы Евдокия Евсикованы, куорат уокуруктааҕы дьаһалтатын бэрэстэбиитэллэрин, үөрэх тэрилтэлэрин уонна бэдэрээттэһэр тэрилтэлэр салайааччыларын кытта хапытаалынай өрөмүөн уонна бөҕөргөтөр-чөлүгэр түһэрэр үлэлэр ыытыллар үөрэх эбийиэктэрин көһө сылдьар көрүүтүн ыытта.
Дьаһал кыттыылаахтара 5 № — дээх «Радуга», 8 № — дээх «Родничок» оҕо саадтарыгар, М.И. Кершенгольц аатынан 9 № — дээх орто уопсай үөрэхтээһин оскуолатыгар уонна 82 № — дээх «Мичээр» оҕо саадыгар сырыттылар.
«Дьиэ кэргэн» национальнай бырайыак чэрчитинэн ыытыллар «Радуга» уонна «Родничок» оҕо саадтарын хапытаалынай өрөмүөннээһиҥҥэ ураты болҕомто уурулунна.
Федеральнай өйөбүл көмөтүнэн Дьокуускайга үөрэх инфраструктуратын саҥардыы салҕанар. Кэнники сылларга куоракка 26 оскуола хапытаалынайдык өрөмүөннэммитэ, оттон быйыл бырагыраамаҕа аан бастаан икки оҕо саада киирбитэ — «Радуга» уонна «Родничок».
Көрүү кэмигэр эбийиэктэргэ үлэ бигэргэтиллибит кыраапыктарга сөп түбэһиннэрэн ыытыллара бэлиэтэннэ.
М.И. Кершенгольц аатынан 9 № -дээх оскуолаҕа сылдьан, бөҕөргөтөр-чөлүгэр түһэрэр үлэлэр ыытыллалларын көрдүлэр. Дьиэҕэ цокольнай бүрүөһүнү бөҕөргөтүү, муостаны уларытыы уонна сылытыы, ону таһынан саҥа дренаж систиэмэтин оҥоруу ыытыллар. Өрөмүөнү атырдьах ыйын ортотугар түмүктүүр былааннаахтар.
82 № -дээх «Мичээр» оҕо саадыгар сотору кэминэн бөҕөргөтөр-чөлүгэр түһэрэр үлэлэр саҕаланыахтара.
Тэрээһин түмүгүнэн куорат баһылыга Дмитрий Садовников эбийиэктэргэ өрөмүөн үлэтэ былааннаах эрэһииминэн баран иһэрин бэлиэтээтэ. Куорат баһылыга 82 № — дээх «Мичээр» оҕо саадын балаһыанньатыгар туспа тохтоото.
«Бүгүн үөрэх управлениета наадалаах бөҕөргөтөр-чөлүгэр түһэрэр үлэни ыытар үбү-харчыны булла. Тэрилтэ аһыллыытын болдьоҕо хамсыан сөбүн өйдүүбүт, төрөппүттэргэ тустаах кыһалҕалары үөскэтиэҕэ. Ол эрээри бу үлэни ыытыы оскуола дьиэтин куттала суох туһанарга наада. Биһиги сорукпут — оҕо саадын харыстаан, төһө кыалларынан түргэнник үлэҕэ төнүннэрии», — диэн Дмитрий Садовников бэлиэтээтэ.
Дьокуускай куорат Дууматын бэрэссэдээтэлэ Альберт Семенов үөрэх тэрилтэлэрин капитальнай өрөмүөннээһин боппуруостара депутатскай корпус куруук хонтуруолугар сылдьалларын тоһоҕолоон бэлиэтээтэ. Урут депутаттар үөрэх, культура уонна оҕо саас бастайааннай хамыыһыйатын үлэтин чэрчитинэн бу эбийиэктэргэ хаста да тахсыбыттара. Үлэ хаачыстыбатын уонна болдьоҕун кэтээн көрүү бары эбийиэги өрөмүөннээһин толору бүтүөр диэри салҕанан барыаҕа.
