Бойобуой дьайыылар бэтэрээннэрин күнүгэр «Патриот» эдэр ыччат киинигэр АБДь бэтэрээннэригэр өйөбүл миэрэлэрин туһунан консультация буолла.
Тэрээһиҥҥэ Агропромышленнай комплекс ресурснай киинин үлэһиттэрэ кытыннылар, кинилэр бэтэрээннэргэ уонна кинилэр дьиэ кэргэттэригэр өйөбүл миэрэлэрин туһунан информация биэрдилэр. Бэтэрээннэри кэтэх хаһаайыстыба уонна фермерскай хаһаайыстыбалары сайыннарыыга туһуламмыт бырагыраамалар тула сиһилии кэпсээтилэр.
2025 сыллаахха саҕаламмыт «Агромотиватор» бырагыраамаҕа улахан болҕомто уурулунна. Бу бырагыраама чэрчитинэн, 9 мөлүйүөн солкуобайтан тахса суумалаах грант бэриллибитэ, бастакы туһанааччыларынан АБДь үс кыттыылааҕа буолбута. Ону тэҥэ «Агростартап» гранынан алта киһи өйөбүлү ылбыта: икки бэтэрээн, икки Герой чугас аймахтара уонна икки АБДь кыттыылаахтарын дьиэ кэргэттэриттэн. Бу хайысханан уопсай өйөбүл суумата 21 мөлүйүөн солкуобайга тэҥнэстэ.
2026 сылга бу сыалга бюджетка 16 мөлүйүөн солкуобай көрүллүбүтэ. Баҕалаахтар сайаапкаларын тутуу уонна куонкурус от ыйыттан атырдьах ыйыгар диэри былааннанар.
Грант суумата 3-тэн 7 мөлүйүөн солкуобайга диэри халбаҥныыр, хайысхатыттан көрөн. Ирдэбил чуолкай уонна өйдөнүмтүө: сири бас билиигэ эбэтэр арендаҕа 5 сылтан итэҕэһэ суох ылыахтаахтар, сыл аайы оҥорон таһаарыыны 7%-тан итэҕэһэ суох улаатыннарыахтаахтар уонна биэс сыл устата уларыйбат үлэ миэстэтин тэрийиэхтээхтэр.
Саамай улахан үп — 7 мөлүйүөн солкуобайга диэри — ынах сүөһүнү иитиигэ бэриллэр (грант 90%-гар диэри ороскуоту сабыан сөп). Хаалбыт хайысхалар, көтөрү иитиини уонна оҕуруот аһын үүннэриини киллэрэн туран, 5 мөлүйүөн солкуобайга диэри үбүлэниэхтэрин сөп.
