Дьокуускай куорат баһылыга Евгений Григорьев бэйэтин баҕатынан болдьоҕун иннинэ дуоһунаһыттан аккаастанар туһунан быһаарыы ылынна. От ыйын 16 күнүгэр кини сайабылыанньатын Дьокуускай куорат Дууматын бэрэссэдээтэлэ Альберт Семёновка туттарда. Ол төрүөтүнэн XXVII уочарата суох сессияны ыҥырар туһунан дьаһалга илии баттанна, манна өрөспүүбүлүкэ салалтатын бэрэстэбиитэллэрэ кыттыахтара диэн бэрэстэбиитэллээх уорган пресс-сулууспата иһитиннэрэр.
Эрдэ Саха сирин баһылыга Айсен Николаев куорат Дууматыгар мэр дуоһунаһыгар хандьыдааттары киллэрбитэ: Саха Өрөспүүбүлүкэтин Бырабыыталыстыбатын бэрэссэдээтэлин бастакы солбуйааччы Дмитрий Садовниковы уонна Владислав Созоновы. Сотору кинилэри олохтоох салайыныыга, сокуону тутуһууга уонна регламеҥҥэ бастайааннай хамыыһыйа көрүөҕэ, онтон дьокутааттарга түмүк оҥорон биэриэҕэ.
«Докумуоннар киирбиттэрин кэнниттэн аналлаах бастайааннай хамыыһыйаҕа уонна Дьокуускай куорат Дууматын президиумугар ыытыллаллар. Онтон боппуруос сессияҕа таһаарыллар, онно хамыыһыйа бэрэссэдээтэлэ хандьыдааттары уонна хамыыһыйа түмүгүн билиһиннэрэр. Ол кэнниттэн дьокутааттар хандьыдааттарга ыйытыылары биэриэхтэрин, санааларын этиэхтэрин уонна дьүүллэһиигэ кыттыахтарын сөп. Салгыы аһаҕас куоластааһын ыытыллыаҕа, онно хас биирдии дьокутаат биир эрэ хандьыдаакка куоластыыр кыахтаныаҕа», — диэн Дьокуускай куорат Дууматын бэрэссэдээтэлэ Альберт Семёнов быһаарда.
Семёнов этэринэн, сессияҕа баар дьокутааттар ахсааннарыттан аҥаарыттан элбэх куолаһы ылбыт хандьыдаат куорат баһылыгынан талыллыбытынан ааҕыллар. «Дьокуускай куорат» куораттааҕы уокурук баһылыгын болдьоҕо — биэс сыл.
Ыспыраапка
Евгений Григорьев 2021 сыллаахха Дьокуускай мээринэн талыллыбыта. Кинини 37 тыһыынчаттан тахса киһи өйөөбүтэ, быыбардааччы кыттыыта 41,73%.
