Бэҕэһээ, бэс ыйын 2 күнүгэр, «Биир ньыгыл Арассыыйа» баартыйа Саха Өрөспүүбүлүкэтин баһылыгар «Дьокуускай куорат» куорат уокуругун баһылыгын дуоһунаһыгар Дмитрий Садовников кандидатуратын киллэрбитин туһунан иһитиннэрдэ.
Эрдэ, ыам ыйын 28 күнүгэр, «Биир ньыгыл Арассыыйа» баартыйа Генеральнай сэбиэтин президиумун быһаарыытынан, өрөспүүбүлүкэ бырабыыталыстыбатын бэрэссэдээтэлин бастакы солбуйааччы Дмитрий Садовников кандидатуратын киллэриигэ сөбүлэҥ ыытыллыбыта.
«Биир ньыгыл Арассыыйа» баартыйа — кандидатураны киллэрэр субъектартан биирдэстэрэ, кинилэр куорат уокуругун баһылыгын дуоһунаһыгар кандидатураны өрөспүүбүлүкэ баһылыгар киллэрэр бырааптаахтар.
Дьокуускай баһылыгын дуоһунаһыгар кандидаттары эрдэттэн көрүү дьаһала саҕаламмытын туһунан иһитиннэрии ыам ыйын 19 күнүгэр өрөспүүбүлүкэ бырабыыталыстыбатын официальнай иһитиннэрэр порталыгар тахсыбыта.
