13 От ыйа 13.07
  • 23°
  • $ 87,74
  • 95,76

Дьааҥы Бээчэтэ тыыннаах. Исписэлиистэр салгыы кэтээн көрөллөр

12:24, 25 сентября 2019
Текст:
Читайте нас на
Яндекс Новости
ЯДВ

Дьааҥы улууһугар дьиэҕэ иитиллибит Бээчэ кулун тутар ыйга көҥүлгэ Чаркы үрэх төрдүгэр ыытыллыбыта. Кэтэрдиллибит анал чииптээх моойторуга кыыл ханан сылдьарын биллэрэ турара. Ый ааһыыта бэлиэ биир сиртэн эрэ кэлэр буолан хаалбыта. Экологияны кэтээн көрөр иниспиэктэрдэр тайах оҕото өлбүт буолуон сөбүн эппиттэрэ. Ити эрээри атырдьах ыйыгар Бээчэ метеорологтар ыстаансыйаларыгар тиийэн кэлбитэ. Биллэн турар, моойторуга суоҕа. Бу туһунан СИА-ҕа Экология министиэристибэтин пресс-сулууспата иһитиннэрэр. 


Дьокуускайтан бөлөх уонна Дьааҥытааҕы экологияны кэтээн көрөр иниспиэксийэ уонна оройуоннааҕы ойуур хаһаайыстыбатын үлэһиттэрэ кулун тутар 30 күнүгэр Бээчэни Чаркы үрэх төрдүгэр көҥүлгэ ыыталлар. Тайах оҕотугар биллэрэр моойторук кэтэрдэллэр. Ый тухары кыыл ханан сылдьарын тэрил иһитиннэрэ турар. Салгыы сигнал хамсаабакка биир эрэ сиртэн кэлэр буолар — Адыаччы үрэх уҥа биэрэгиттэн. «Усть Чакры» метеоыстаансыйа үлэһиттэрэ эмиэ кыыл кинилэргэ кэлбэт буолан хаалбытын, суола да көстүбэтин кэпсииллэр. Онон быһа барыллаан, тайах өлбүт эбэтэр моойторуга түспүт буолуон сөп диэн быһаараллар.

От ыйыгар Дьааҥытааҕы иниспиэксийэ үлэһиттэрэ метеорологтары уонна уопсастыбаннай иниспиэктэрдэри кытта Бээчэни көрдөөһүҥҥэ туруналлар. Икки күн устата моойторугу эбэтэр өлө сытар кыылы булар сыаллаах үлэлииллэр. Ити эрээри моойторуктан кэлэр биллэрии хойуу мастаах ойууру ыйар буолан, ити көрдөөһүҥҥэ харгыстары үөскэтэр.

Онтон атырдьах ыйын 1 күнүгэр доруобай, улааппыт Бээчэ метеорологтарыгар күүлэйдии кэлэр. Биллэн турар, моойторуга суох. Ол кэннэ ыстаансыйаҕа хам-түм ыалдьыттыыр.

Кулун тутар ыйга, моойторугу кэтэрдэллэригэр кыыл улаатарын учуоттаан, боробулуоханан баайбыттара. Буолталаатахха этэ-сиинэ соноотоҕуна, тыынын хаайыан сөптөөҕө. Онон тутулуга өһүллэн, моойторук тууллан түспүт буолуон сөп.

Билигин Бээчэ туруга эдэр атыыр тайахха кубулуйар.

Богдан Гончарук салалтатынан метеорологтар тайах сылдьар сирдэригэр сэрэтэр бэлиэлэри туруораллар, уонна хаар түһүөр диэри моойторугу көрдүүр үлэни ыытыахтара. Маны сэргэ, тайахха ыраахтан сандааран көстөр таҥас бэлиэ иилиэхтэрэ.

Бээчэ күүһэ-уоҕа сааһыгар сөптөөх. Бу өссө биирдэ кыыл оҕотун көҥүлгэ ыытыы сөптөөх быһаарыы буоларын бигэргэтэр.

Следите за самым важным и интересным в Telegram-канале и WhatsApp-группе ЯСИА