21 Тохсунньу 21.01
  • -48°
  • $ 73,82
  • 83,32

Чурапчы Төлөйүгэр мас олортулар, саҥа быласаакка арыйдылар

10:41, 04 июня 2016
Текст:

Чурапчы улууһун Төлөй нэһилиэгэр бэс ыйын 3 күнүгэр бэрт сэргэх тэрээһин буолан ааста. Нэһилиэк дьоно күргүөмүнэн тахсан сквергэ уонна оскуола таһыгар мас уонна сибэкки олортулар. Бу тэрээһин, бастатан туран, өрөспүүбүлүкэҕэ Тупсарыныы сылын уонна бүтүн Россиятааҕы «Лес Победы» акция чэрчитинэн ыытыллынна.


Төлөй нэһилиэгэ бу күн Тупсарыныы сылыгар биир дьоһун хардыыны оҥордо, холобур буолар тэрээһини ыытта. Баһылык Н.И. Аммосов дьонун-сэргэтин сайдыы туһугар үлэ тула түмтэ. Олук уурулунна, онон мантан сайын сыл чэрчитинэн улахан бырайыактар олоххо киириилэригэр бэрт саҕалааһын буолла.

Төлөйдөр нэһилиэктэрэ тупсаҕай буолуутугар улахан болҕомто уурар буолбуттарын, ис сүрэхтэриттэн кыһаллан, маннык тэрээһиннэргэ көхтөөхтүк тахсалларын үөрэ бэлиэтиибит. Эдэрдэргэ холобур буолан ССРС судаарыстыбаннай бириэмийэтин лауреата Толстоухов Михаил Семенович хас да маһы бэйэтинэн олорто.

Салгыы орто оскуола сайдар хайысхатын бигэргэтэн спортивнай былаһаакканы арыйыы сиэрэ-туома тэриллиннэ. Оҕо көмүскэлин күнүгэр анаммыт дьаһаллар чэрчилэринэн бу үөрүүлээх дьаһал ыытыллыбыта нэһилиэк оҕотун барытын муста. Саҥа тэлгэммит оҥоһуу газоҥҥа футболга күрэхтэстилэр, көрдөөх эстфетаҕа хамаанданан илин-кэлин түһүстүлэр.

Олохтоохтору кытта тэҥҥэ Төлөйтөн төрүттээхтэр кэлэн норуот субуотунньугар кыттыыны ыллылар. Ол курдук Дьокуускай куораттан өрөспүүбүлүкэ салалататыттан анаммыт куратор, РИК хампаанньа генеральнай директорын солбуйааччы И.Н. Аммосов, Дьокуускай куоракка баар «Төлөй» түмсүү салайааччыта В.И. Нестеров, Чурапчы улууһун дьаһалтатыттан анаммыт куратор, улуус мунньаҕын сэкирэтээрэ Т.П. Сивцева, Чурапчы сэлиэнньэтигэр олорор Төлөйтөн төрүттээхтэр түмсүүлэрин салайааччыта А.А. Захаров мас олордуһан, дьону көҕүлээтилэр.

Маны таһынан нэһилиэк шефтээх тэрилтэлэрэ сайылыктан үүт таһыллар суол өрөмүөнүгэр техниканан уонна биригээдэлэринэн күүс-көмө буолбуттарыгар олохтоохтор махтаннылар. Чурапчытааҕы колледж кэлэктиибэ биригээдэ ыытан уонна «Хатан» ХЭТ техниката кэлэн элбэх үлэ оҥоһуллунна.

20160603_170602

0
0
21 января 21.01
  • -48°
  • $ 73,82
  • 83,32