12 Атырдьах ыйа 12.08
  • 17°
  • $ 60,62
  • 62,52

Чакыр хоһуун үлэһиттэригэр өйдөбүнньүк бэлиэ туруордулар

17:01, 17 ноября 2020
Текст:

Чурапчы улууһун Чакыр нэһилиэгэр бэйэлэрин кэмнэригэр тыа хаһаайыстыбатыгар муҥутуур үрдүк көрдөрүүнү ситиспит хоһуун үлэһиттэргэ өйдөбүнньүк стела туруордулар. Стеланы нэһилиэккэ гаас кэлиитин көрсө туруордулар. Бу туһунан улуус пресс-сулууспата иһитиннэрэр.


«Аал Луук мас» быһыылаах Екатерина Филипповаҕа уонна Гаврил Адамовка-Халлаҕа анаммыт стеланы Иннокентий Адамов оҥорбут.

Екатерина Филиппова 1943 сыллаахха биир күн иһигэр 1500 баайыы бурдугу хомуйан былаанын 950 % толорбут. Гаврил Адамов-Халла сэрии кэннэ биир күҥҥэ 1,87 га сири охсубут. Оччолорго Чакыр олохтоохторун холобурун өрөспүүбүлүкэҕэ киэҥник тарҕаппыттар.

Стеланы аһыы үөрүүлээх тэрээһинигэр үтүө дьон аймахтара, нэһилиэк олохтоохторо, ыалдьыттар сырыттылар.

Бу күн саха бастакы романист суруйааччытыгар Семен Яковлев — Эрилик Эристиин пааматынньыгар сибэкки уурдулар.

«Өтөрдөөҕүтэ Эрилик Эристиин «Дьаҕа баһа» диэн ааттаабыт Чакыра билигин гаас ситимигэр холбонон, суола оҥоһуллан өрөспүүбүлүкэ биир бастыҥ нэһилиэгэ», — диэтэ улуус баһылыга Андрей Ноговицын. 

Билигин манна 600-тэн тахса киһи олорор. 1200 ынах-сүөһү, ол иһигэр 480 ыанньык, 900-тэн тахса сылгы баар. Олохтоохтор сыллата 480 туонна үүтү туттараллар.

Следите за самым важным и интересным в Telegram-канале и WhatsApp-группе ЯСИА
0
0