24 От ыйа 24.07
  • 24°
  • $ 87,3
  • 95,46

Бастыҥ видеоклиптаах кырачааннар

11:19, 17 июня 2016
Читайте нас на
Яндекс Новости
ЯДВ

«Саха» НКИК «Ымыычаан» оҕолорго аналлаах биэриитэ өрөспүүбүлүкэ оскуолаларыгар уонна оҕо саадтарыгар видеоклиптары устан ыыталларыгар куонкурус биллэрбитэ. Куонкурус кэнчээри ыччаты төрөөбүт дойдуга бэриниилээх буоларга, иитиллибит ийэ сири таптыырга, үтүө үгэһи харыстыырга, дойдутун историятын билэргэ сирдиир, иитэр-үөрэтэр суолталаах буолуохтааҕа ирдэниллибитэ. Бу куонкуруска Сунтаартан, Үөһээ-Бүлүүттэн, Тааттаттан, Горнайтан, о.д.а. улуустартан, Дьокуускай куораттан оҕо иитиитигэр үлэлиир кыһалар көхтөөх кыттыыны ылбыттара.


Куоластааһыҥҥа күрэстэһии сытыытык барбыт, эрбии тииһин курдук тэҥҥэ эриһии буолбут. Онтон түмүккэ, Таатта улууһуттан Боробул бөһүөлэгин «Мичил» оҕо саадын «Хайыһар» видеоклибэ барыларыттан чорбойон бастакы күөҥҥэ түспүт, өрөспүүбүлүкэ куонкуруһун кыайыылаахтарынан ааттаммыт. Бу туһунан оҕо саадын «Кэнчээри» бөлөҕүн иитээччитэ, видеоклибы устууга элбэх түбүгү-садьыгы көрсүбүт Лариса Поповалыын кэпсэттим.

«Улууспутугар байыаннай-патриотическай күрэхтэһии, видеоклиптарынан куонкурустар тиһиктээхтик ыытыллаллар. Быйыл оскуолаларга уонна оҕо саадтарыгар байыаннай ырыаларынан кыттарга сыал-сорук туруоруллубута. Онно бөлөҕүм оҕолорун кытыннардым. Дойдулаахпыт «Слава» уордьан толору кавалера, киэн туттар ытык киһибит Дмитрий Петров төрөөбүтэ 95 сылынан уонна нэһилиэкпит ытык кырдьаҕастарын, сэрии, тыыл бэтэрээннэрин ахтан-санаан, кинилэргэ сүгүрүйэн «Хайыһар» ырыанан видеоклип оҥордубут. Бэлэмнэниибит, видеоҕа устуубут эрдэттэн саҕаламмыта. Таҥас-сап тигиитигэр, аптамааттарын-сааларын чочуйуутугар, уһаныытыгар төрөппүттэр бүтүн дьиэ кэргэнинэн санаалара өрө көтөҕүллэн, ураты көхтөөхтүк кытыннылар. Декорациятыгар, о.д.а. элбэх үлэтигэр бииргэ үлэлиир дьонум Саргылаана Рожина, Мария Бысыина, Мотрена Ефремова, Лилия Бочонина, ийэм Мария Попова элбэх сүбэни-аманы биэрэн, тэҥҥэ түбүгүрэн, сүүрэн-көтөн улаханнык көмөлөстүлэр. Нэһилиэк киэн туттар кырдьаҕаһа, үлэ бэтэрээнэ Иван Дорбохов кырачааннары кытта көрсүһүүтэ, кэпсэтиитэ видеоклиппытын ситэрэн-хоторон биэрдэ. Онтон «Таатта» телестудия оператора Петр Докторов ыйан-кэрдэн, клибы устан санаабытын бөҕөргөтөн, улахан куонкуруска холонорбутугар тирэх буолла. Бастакы холонуубут ситиһиилээх буолбутуттан үөрэбит уонна түгэнинэн туһанан биһигини өйөөбүт бар дьоммутугар махтанабыт», — диир Лариса Анатольевна.

Кыайыыттан кынаттаммыт оҕо саадын кэллэктиибэ үлэлиир былаанын өссө сайыннарар, кэҥэтэр сыаллаах-соруктаах. Онтон төрөппүттэр кэнчээрилэрин туһугар тэрээһиннэргэ көхтөөхтүк кыттарга бэлэмнэрин биллэрэллэр.

Следите за самым важным и интересным в Telegram-канале и WhatsApp-группе ЯСИА