Бүлүү, Яна өрүстэригэр уу туһүүтэ бэлиэтэнэр. Өлүөнэ өрүһүгэр Ленскэй, киин улуустар туһаайыыларынан төттөрүтүн уу тахсар. Бу туһунан СИА метеосулууспа управлениетын иһитиннэриитигэр сигэнэн суруйар.
Управление иһитиннэрэринэн Өлүөнэ өрүһүгэр Ленскэй, киин улуустар туһаайыыларынан уу сууккаҕа 5 — 70 см эбиллэр. Чугастааҕы икки күҥҥэ уу эбиллэрэ күүтүллэр.
Атын өрүстэргэ уу нэдиэлэ бүтүөр диэри түһүө.
Бүлүү, Яна өрүстэрин уулара өрүс ааллара сылдьалларыгар күчүмэҕэйдэри үөскэтэр гына түһэн турар, дииллэр Управление исписэлиистэрэ. Итини таһынан, Уус Ньара аннынан Индигиир өрүһэ түһэн турар.
