Улуу Кыайыы күнүн иннинэ Саха сирин үрдүнэн тыыл бэтэрээннэрин, Кыайыыны уһансыбыт буойуннар кэргэннэрин чиэстииллэр, кинилэргэ сэрии сылларын ырыаларын аныыллар, өйдөбүнньүк бэлэхтэри, тыыннаах сибэккилэри туттараллар.
Улуу Кыайыы 81 сылын көрсө ыам ыйын 7 күнүгэр Бүлүү улууһун, нэһилиэктэр дьаһалталарын тэрийиилэринэн эҕэрдэлиир бөлөхтөр тыыл бэтэрээннэрин, сэрии бэтэрээннэрин кэргэннэрин дьиэлэригэр эҕэрдэлээн сырыттылар.
Бүлүү куоратыгар бүгүҥҥү күҥҥэ олорор 19 тыыл бэтэрээнин 3 бөлөх эҕэрдэлээтэ.
Депутаттар оройуоннааҕы Сэбиэттэрин бэрэссэдээтэлэ Гаврил Корякин салайааччылаах эҕэрдэлиир бөлөх тыыл бэтэрээннэригэр Ульяна Михайловна Каратаеваҕа, Анна Ивановна Волгинаҕа, Анастасия Федотовна Капитоноваҕа, Анна Максимовна Даниловаҕа, Александра Николаевна Унароваҕа ыалдьыттаатылар, Ирина Никифоровна Макароваҕа бэлэх туттардылар.
Гаврил Корякин, куорат депутаттарын Сэбиэтин бэрэссэдээтэлэ, И.М.Гоголев-Кындыл аатынан улуустааҕы бибилэтиэкэ дириэктэрэ Николай Харлампьев, улуус дьаһалтатын социальнай бэлиитикэҕэ, эдэр ыччат дьыалатыгар отделын салайааччы Елена Федорова тыыл бэтэрээннэрин истиҥник эҕэрдэлээтилэр, иһирэхтик сэһэргэстилэр.
Кинилэр тыыл бэтэрээннэригэр улуус баһылыга Сергей Винокуров, куорат баһылыга Ян Попов ааттарыттан сэмэй бэлэхтэри туттардылар.
Култуура сайдыытын уонна норуот айымньытын оройуоннааҕы киинин үлэһиттэрэ, дэгиттэр талааннаах, кэрэ куоластаах ырыаһыттар Ольга Корякина, Мария Быканова, Салтанат Маччаева уонна Владимир Афанасьев тыыл бэтэрээннэрин сахалыы Илья Винокуров-Чаҕылҕан тылларыгар уонна Андрей Костин мелодиятыгар «Хайыһар» ырыаны толорон, сэрии кэминээҕи уостан түспэт нууччалыы ырыалары ыллаан сэргэхситтилэр.
Ытык кырдьаҕастар иһирэх кэпсэтиилэртэн, ырыа истибиттэриттэн улаханнык долгуйбуттарын, астыммыттарын биллэрдилэр, элбэх ыйытыктары биэрдилэр.
— Дьиэбэр кэлэн эҕэрдэлээбиккитигэр улахан махталбын тиэрдэбин, олус үчүгэй ырыалары бэлэхтээтигит! Чуондулуга учууталлыы сылдьыбыппын истиҥник ахтабын, бүгүн кэлбит Ольга Корякина, Гаврил Корякин төрөппүттэрин, эһэлэрин, эбэлэрин үчүгэйдик билэбин, үөрэппитим, үчүгэй дьон этэ, — диэн 94 саастаах Анна Ивановна Волгина махтанна.
Бүлүү улууһугар бүгүҥҥү күҥҥэ 40 тыыл бэтэрээннэрэ, сэрии кыттыылаахтарын 6 кэргэннэрэ олороллор, ол эбэтэр, барыта 46 тыыл бэтэрээннэрэ ол кэминээҕи аас-туор олоҕу, Кыайыы туһугар түмсүүлээх, дойдуга бэриниилээх буолууну эдэр көлүөнэҕэ итэҕэтиилээхтик тиэрдэллэр, СИА-ҕа суруйда Николай Куприянов, «Олох суола» хаһыат.
