Бүгүн Дьокуускайга саха народнай поэта уонна саха народнай суруйааччыта, Максим Горькай аатынан Россия Федерациятын Судаарыстыбаннаһын бириэмийэтин лауреаттара Семен уонна Софрон Даниловтарга аналлаах пааматынньык үөрүүлээх быһыыга-майгыга арылынна. Горнай улууһун олохтоохторо кыттыыны ыллылар.
Семен уонна Софрон Даниловтарга анаммыт пааматынньык Саха Өрөспүүбүлүкэтин Судаарыстыбаннаһын күнүгэр туруоруллубута ураты суолталааҕын мустубут дьон бэлиэтээтилэр.
Үөрүүлээх тэрээһиҥҥэ СӨ Ил Дархана Айсен Николаев, «Горнай улууһа» МТ баһылыга Никита Андреев, Софрон Данилов кыыһа философия наукатын доктора Вера Данилова, саха народнай суруйааччыта Николай Лугинов эҕэрдэлэрин тириэртилэр. Ини-бии Семен уонна Софрон Даниловтар Саха Өрөспүүбүлүкэтин, литература сайдыытыгар ураты оруолларын туһунан истиҥник ахтан-санаан аастылар, сибэкки дьөрбөтүн уурдулар.
Вера Данилова пааматынньык Дьокуускай куорат килбэйэр киинигэр туруорулларыгар үлэлэспит СӨ бырабыыталыстыбатыгар, Горнай улууһун дьаһалтатыгар махталын тириэртэ.
Семен уонна Софрон Даниловтар ааттарыгар сүгүрүйэн, СӨ Бырабыыталыстыбата, СӨ народнай депутаттара, биир дойдулаахтара, суруйааччылар сойуустарын чилиэннэрэ муһуннулар. Саха уонна Олоҥхо театрдарын артыыстара Семен Данилов “Мин олоҥхо оҕотобун» хоһоонун ааҕан киэргэттилэр.
Ини-бии Семен уонна Софрон Даниловтар Ленин проспегын 36 №-дээх дьиэтигэр олорбуттара. Онон биир дойдулаахтара пааматынньык бу дисторическай миэстэҕэ саамай сөптөөхтүк туруоруллубутунан киэн тутталларын эттилэр.
Пааматынньыгы Платон Ойуунускай аатынан Судаарыстыбаннай бириэмийэ лауреата, РФ үтүөлээх худуоһунньуга Семен Прокопьев уонна СӨ Бочуоттаах архитектора Алексей Самсонов оҥордулар.
