Бэҕэһээ, «Модун» спортивнай кииҥҥэ дуобакка уһун уонна тыҥааһыннаах күрэхтэһии түмүктэннэ.
Саха сирин хамаандатын эдэр, дьоҕурдаах дуобатчыттара сытыы комбинациялардаах оонньуулары көрдөрөн, алта мэтээл хаһаайыннарынан буоллулар.
Сүүс харахтаах дуобакка кыргыттарбыт табыллан оонньоотулар. Чурапчытааҕы спортивнай интернат оскуолатын иитиллээччитэ, Өлүөхүмэттэн төрүттээх Ксения Нахова эрэллээхтик чөмпүйүөннээтэ, онтон кини бииргэ дьарыктанар үөлээннээҕэ, Дьокуускайдааҕы 5№-х оҕо спортивнай оскуолатын үөрэнээччитэ Елена Кычкина үрүҥ көмүс мэтээли ылары ситистэ.
Уолаттарга Чурапчытааҕы оҕо спортивнай оскуолатыттан Валентин Иванов Башкортостан күүстээх дуобатчытыгар эрэ хотторон, үрүҥ көмүс мэтээл хаһаайынынан буолла.
Нуучча дуобатыгар эмиэ кыргыттарбыт үчүгэй бэлэмнээхтэрин көрдөрөн, ордон таҕыстылар. Амма оскуолатын үөрэнээччитэ Ирина Птицына үрүҥ көмүс, Горнай улууһун оскуолатын үөрэнээччитэ Тунаара Федорова боруонса мэтээллэри ылан, оонньуур таһымнара үрдээбитин биллэрдилэр.
Уолаттарга Горнайдааҕы спортивнай оскуола чиэһин көмүскээбит, Бүлүүттэн төрүттээх Валентин Орлосов сүрүн күүстээх утарсааччыларын кытта эрбии биитин курдук эрийсэн, үрүҥ көмүс мэтээли ылыан ылла.
— Уопсайа уон икки мэтээл оонньоммутуттан алта мэтээли ыллыбыт. Ол эрээри кыһыл көмүс мэтээлбит аҕыйах. Оҕолорбут бэйэлэрин дойдуларыгар оонньууллара бу курдук олус долгутуулаах, эппиэтинэһэ наһаа улахан буолар. Аттыларыгар төрөппүттэрэ, тренердэрэ, дуобаты таптааччылар бары кинилэргэ күүскэ «ыалдьаллар» уонна кыайыыны эрэ эрэйэллэр. Ол иһин наһаа ыгыллан, бэйэлэрин кыахтарын ситэ туһамматылар дии санаатым. Ону таһынан биирдиилээн регионнар, атын дойдулар Россияҕа, Европаҕа уонна аан дойдуга чөмпүйүөннээбит оҕолорун илдьэ кэлэн, мэтээлбит аҥаарын илдьэ бардылар. Ол да буоллар биһиги дуобатчыттарбыт кыайыыга дьулуһан, ситиһиилээхтик оонньоотулар, — диэтэ дуобакка Саха сирин хамаандатын сүрүн тренерэ, нуучча дуобатыгар Россия гроссмейстера Александр Азаров.
