Өрөспүүбүлүкэ улуустарын баһылыктарын кытта регион салайааччыта Айсен Николаев көрсөрүгэр Кыайыы 75 сылын бэлиэтииргэ улахан болҕомто ууралларыгар көрдөстө. Бэтэрээннэргэ көмөттөн саҕалаан, Саха сирин буойуннарын ааттарын сүгэр бэлиэ сирдэри тупсарыыга тиийэ.
«Кыайыы 75 сылын бэлиэтиир сылы мин өрөспүүбүлүкэбитигэр Төрөөбүт дойдуга бэриниилээх буолуу сылынан биллэрдим. Уратылаах сыл буоларыгар итэҕэйэбин. Дьиҥ сыаннастары сыаналыырга уонна төрөөбүт дойду иннигэр эппиэтинэстээх буолууга саҥа кыахтары арыйарыгар эрэллээхпин. Былаас бары таһымыгар Кыайыы 75 сылын бэлиэтээһин ураты суолталаах. Кыайыы күнүн иннинэ туох баар бэтэрээннэргэ биир кэмнээх көмө оҥоһуллуоҕа. Сэрии кыттыылаахтарыгар уонна инбэлииттэригэр 100 тыһ.солк. буолуоҕа. Сэрии сылларын оҕолоругар быйыл төлөбүр көрүллүө», — диэтэ Айсен Николаев.
Ил Дархан муниципалитеттар баһылыктарыгар сэрии кыттыылаахтарыгар, тыыл бэтэрээннэригэр, сэрии кэмин оҕолоругар көмөнү оҥорууну тус хонтуруолларыгар туталларыгар эттэ. Хас биирдии бэтэрээн кыһамньылаах сыһыаны билиэхтээх уонна кыһалҕатын туоратарыгар аккааһы ылыа суохтаах. Буойуттар ааттарын сүгэр пааматынньыктары саҥардыыга, уулуссалары, үөрэх тэрилтэлэрин уһаайбаларын тупсарыыга ылсалларыгар этилиннэ.
«Көхтөөх кыттыыны ыларгытыгар, уопсастыбаннаһы көҕүлүүргүтүгэр. Патриотизм сылыгар туруоруллубут соруктары бары бииргэ түмсэн ылыстахпытына эрэ, сыалбытын ситиһиэхпит», — диэтэ Ил Дархан.
