Анал байыаннай дьайыы бэтэрээнэ Аркадий Пудов М.Е. Николаев аатынан Өктөмнөөҕү билим-үөрэтэр киин дириэктэринэн үлэлиир. Ону тэҥэ кини Донбасс доброволецтарын холбоһуктарын Саха сиринээҕи салаатын салайар.
«Педагог буолан, АБДь зонатыттан төннүбүтүм кэннэ оҕолору, ыччаты патриотическай иитиинэн дьарыктанан барбытым. Университет устудьуоннарыгар, орто анал үөрэх тэрилтэлэригэр уонна оскуола оҕолоругар «Хорсун быһыы уруоктарын» ыытабын, Россия «Билии» уопсастыбатын лектора буолабын. Былырыын бу хайысханан Пятигорскайга семинарга кыттыбытым», — диэн бэтэрээн кэпсээтэ.
2023 сыллаахха Аркадий Пудов хантараак түһэрсэн «Боотур» подразделениеҕа киирэр «Барс-2» доброволецтар этэрээттэрин састаабыгар бойобуой дьайыы зонатыгар барбыта. Кини Харьков уобалаһын территориятыгар кыргыһыыга кыттыбыта.
Дьиэтигэр төннөн баран «Защитники Отечества» судаарыстыбаннай пуонда Саха сиригэр филиалыгар тиийэр. Социальнай сүрүннээччинэн Анна Андрееваны аныыллар, кини бары сөптөөх өйөбүл дьаһалларын ыларыгар көмөлөспүтэ уонна бэтэрээни патриотическай иитиигэ үлэҕэ сыһыарбыта.
«Аркадий Аркадьевич – олоххо олус көхтөөх көрүүлээх бэтэрээн. Педагог быһыытынан судаарыстыбаннай пуонда филиалын патриотическай тэрээһиннэригэр уонна общественнай бырайыактарыгар үөрэ- көтө кыттар», — диэн социальнай сүрүннээччи бэлиэтээтэ.
Аркадий Пудов общественнай олоххо көхтөөхтүк кыттарын салгыыр. Кини Россия «Билии» обществотын лектора буолар.
АБДь бэтэрээннэрин өйүүр уонна эйэлээх олоххо көҕүлүүр үлэ Россия президенэ Владимир Путин сорудахтарын уонна бойобуой дьайыылар кыттыылаахтарын социальнай көмүскээһиҥҥэ туһуламмыт национальнай бырайыак чэрчитинэн ыытыллар.
