17 Тохсунньу 17.01
  • -48°
  • $ 73,82
  • 83,32

Күндү Саха сирин дьахталлара!

13:56, 07 марта 2016
Текст:

Саха Өрөспүүбүлүкэтин Ил Түмэнэ эһигини сандал саас кэрэ бырааһынньыгынан – Дьахталлар аан дойдутааҕы күннэринэн эҕэрдэлиир!

Дьахтар бу орто туруу бараан дойдуга төрүүр оҕону төлкөлүүр, кэнэҕэски кэскили түстүүр, чөл куттаах көлүөнэни иитэр аналлаах. Урут даҕаны, билигин даҕаны ийэ барахсан оҕо туһугар улахан эппиэтинэһи сүгэр. Кини тулуурунан, дьулуурунан, аһыныгас майгытынан, мындыр өйүнэн норуот өлбөт-сүппэт суолугар олук уурсар.
Бу сыл кулун тутар ыйыгар Саха сирин дьахталларын XIV съеһэ буолаары турар. Үлэһит дьахталлар Саха сиринээҕи I съезтэрин тэрийиигэ Евдокия Саввина саҕалаабыт дьыалата чиэстээхтик салҕанар. Быйыл өрөспүүбүлүкэ общественноһа Социалистическай Үлэ Геройа, нэһилиэк депутаттарын сэбиэтин бэрэссэдээтэлэ Анна Васильева-Сэбиэт Аана; дирижер, РСФСР искусствотын үтүөлээх деятелэ, САССР народнай артыыһа Галина Кривошапко; РСФСР уонна САССР народнай артыыһа Матрена Слепцова; судаарыстыбаннай уонна политическай деятель, САССР үтүөлээх учуутала Анастасия Данилова төрөөбүттэрэ 100 сылларын; олоҥхоһут Екатерина Иванова төрөөбүтэ 125 сылын, өрөспүүбүлүкэҕэ оҕо фтизиатриятын төрүттээбит, В.И.Ленин, Үлэ Кыһыл Знамятын, «Бочуот знага» уордьаннарын кавалердара Татьяна Дмитриева төрөөбүтэ 110 сылын; судаарыстыбаннай уонна уопсастыбаннай деятель, САССР Үрдүкү Сэбиэтин Президиумун Бэрэссэдээтэлэ, Саха Өрөспүүбүлүкэтин бочуоттаах олохтооҕо Люлия Григорьева 75 сааһын бэлиэтиэ.
Биһиги кэрэ аҥардарбыт олоххо көхтөөх сыһыаннарынан, бары салааҕа дьоһуннаах үлэлэринэн, уопсастыба уонна бэлиитикэ эйгэтигэр ситиһиилэринэн киэн туттабыт.
Саха Өрөспүүбүлүкэтин Ил Түмэнэ дьиэ кэргэни, ийэ буолууну уонна оҕо аймаҕы сокуон өттүнэн араҥаччылыырга туһуламмыт дьаһаллары ылынар, кинилэр бырааптарын уонна интэриэстэрин көмүскүүргэ сүрүн болҕомтотун уурар. Парламент демография бэлиитикэтигэр сокуону оҥорууга, сайыннарыыга үлэтин салгыы ыытар.
Саха Өрөспүүбүлүкэтин судаарыстыбаннай былааһын уорганнара оҕо төрүүр ахсаана элбиирин туһугар саҥа уһуйааннары, оскуолалары туттаран үлэҕэ киллэрэр, киллэриэ даҕаны.

Күндү дьахталлар!
Эһиги истиҥ тапталгыт, ахсаабат кыһамньыгыт уонна үтүө өйөбүлгүт хас биирдии ыал, бүтүн уопсастыба ситиһиитигэр уонна чэчирии сайдарыгар бигэ тирэх буолар.
Эһиэхэ үлэҕитигэр, олоххутугар үрдүк ситиһиини, сааскылыы чэбдик, чөл туругу, алаһа дьиэҕитигэр этэҥҥэ буолууну баҕарабыт!

Саха Өрөспүүбүлүкэтин Ил Түмэнэ

0
0
Тутаах тыллар
17 января 17.01
  • -48°
  • $ 73,82
  • 83,32