«Абакан» спорткомплекска алтынньы 20 — 21 күннэригэр Бүтүн Россиятааҕы Сергей Карамчаков кэриэһигэр көҥүл тустууга күрэхтэһии буолла. 97 кг диэри кыайыылааҕынан Саха сириттэн Максим Толмачев таҕыста, диэн СИА «Спорт Якутии» сигэнэн суруйар.
Аллайыахаттан төрүттээх, ХИФУ устудьуона Максим Толмачев турнирга киирсиигэ икки кыайыыланна. Финал аҥарыгар тувинеһы 12:2 ахсаанынан баһыйа тутта. Финалга Толмачев көбүөр хаһаайынын 10:0 кыайда.
Күрэхтэһиигэ барыта 128 спортсмен кытынна. Түмүккэ ыйааһыннарыгар бастаабыттар «Россия спордун маастара» ааты ыллылар.
Максим Толмачев Роман Дмитриев кэриэһигэр ыытыллыбыт норуоттар икки ардыларынааҕы турнир юниордарга чемпиона, Дмитрий Коркин мемориалын призера. Быйылгы Д.Г. Миндиашвили аатынан Академия бирииһигэр Красноярскайга Бүтүн Россиятааҕы турнир кыайыылааҕа.
