29 Тохсунньу 29.01
  • -48°
  • $ 73,82
  • 83,32

Хороҕо икки күннээх тустуу түмүктэннэ: сүрүн бириистэр үөһээ бүлүүлэргэ хааллылар

10:32, 22 февраля 2016
Текст:

Үөһээ Бүлүү улууһун Хоро нэһилиэгэр Василий Степанов-Бучугурас аатынан өрөспүүбүлүкэтээҕи турнирга уопсайа 15 улуустан 225 тустуук мустан, күөн көрүстүлэр. Оҕолорго (45, 50, 55, 62, > 62) — 80, эр дьоҥҥо (55, 62, 70, 80, 90, > 90) — 105 уонна бэтэрээннэргэ (60, 70, 80, 90, > 90) — 40 спортсмен кытынна. Кыттааччылартан 37-тэ спорт маастара. Онон олус тыҥааһыннаах, эрийсиилээх киирсиилэр буоллулар.


Муҥутууру былдьаһар күрэххэ: бэтэрээннэргэ уонна эр дьоҥҥо биирдии убаһа, оҕолорго тарбыйах бириис туруорбуттар. Ити эрээри бэтэрээннэргэ, балаһыанньа быһыытынан, 10 киһи кыайан хомуллубакка, күрэх буолбата. Ол иһин бэтэрээннэр убаһаларын оҕолорго туруордулар. «Оҕолорго бастаабыкка убаһа, иккискэ ньирэй», — диэн хамыыһыйа быһаарыыта тахсыбыта. Барыта 22 оҕо кыттыбытыттан, Хороттон төрүттээх Оҥхой ыччата Владик Илларионов бастаата.

Улахан дьоҥҥо Увар Тимофеев кими да тулуппата, убаһа хаһаайынынан буолла. Бэлиэтээн эттэххэ, Увары кытта биллэр тустуук Юрий Старостин киирсиитэ олус умсугутуулаахтык ааста. Юрий охтубата эрээри, очконан сабарыйтарда.

Тустуу биир ураты түгэнинэн ыйааһыннарыгар бастаабыт тустууктар ортолоругар «Нива» массыынаны оонньотуу буолла. Балаһыанньа быһыытынан, массыына сүүйүүлээх кумааҕыны анал биир тэҥ коробкаларга уган, подностарга тутан таһаардылар. Дьэ, бу мантан уолаттар бэйэлэрэ талан ылыахтаахтар. Ким бастаан таларын эмиэ сэрэбиэй быһаарда. Күүстээхтэр бары коробкаларын таллылар. «Арыйыҥ!» — диэн хамаанданы кытта, тэбис-тэҥҥэ арыйа баттыыллар. Супер-бириис 55 кг ыйааһыҥҥа бастаабыт Олег Федотов илиитигэр түбэстэ!

«Онон икки күннээх тустуу бырааһынньыгын сүрүн бириистэрэ үөһээ бүлүүлэргэ бэйэбитигэр хаалла», — диэн Хоро нэһилиэгин баһылыгын солбуйааччы Александр Попов иһитиннэрдэ.

0
0
29 января 29.01
  • -48°
  • $ 73,82
  • 83,32