Бу нэдиэлэҕэ, от ыйын 22 күнүгэр, 29 №-дээх биир мандааттаах быыбардыыр уокурук уокуруктааҕы быыбардыыр хамыыһыйатын мунньаҕар Арассыыйа Федерациятын Судаарыстыбаннай Дууматын тохсус ыҥырыылаах дьокутааттарын быыбарыгар үс хандьыдаат эбии регистрацияланна, суруйда Саха парламент саайт.
Ол курдук, КПРФ баартыйаттан Айаан Васильев, «Саҥа дьон» баартыйаттан Нюргуяна Заморщикова, «Сиэрдээх Арассыыйа» баартыйаттан Федот Тумусов турдулар. Санатар буоллахха, от ыйын 16 күнүгэр Судаарыстыбаннай Дуума дьокутаатыгар ЛДПР баартыйаттан Гаврил Парахин регистрацияламмыта.
Регистрацияламмыт хандьыдааттарга анал дастабырыанньалар туттарылыннылар. Саха сирин 29-с нүөмэрдээх биир мандааттаах быыбардыыр уокуругар хандьыдааттарынан турууга докумуоннарын 10 киһи биэрбит, ол иһигэр биир киһи бэйэтин туруоруммут.
Санатар буоллахха, Арассыыйа дьылҕатыгар улахан суолталаах быыбар быйыл балаҕан ыйын 18-20 күннэригэр буолуоҕа. Дойду үрдүнэн барыта 450 дьокутааты талыахпыт, мантан 225-һин — баартыйалартан испииһэгинэн, биир итиччэни — биир мандааттаах уокуруктарынан.
Хандьыдааттары эбии регистрациялааһын от ыйа 27 күнүгэр буоларын туһунан Саха сиринээҕи киин быыбардыыр хамыыһыйата иһитиннэрэр.
