Саха сиригэр орто анал үөрэх тэрилтэлэригэр докумуоннары туттарыы хампаанньата бүтэр уһугар чугаһаан эрэр. Докумуону туттарыы атырдьах ыйын 15 күнүгэр диэри салҕанар. Билиҥҥи туругунан, 6864 бүддьүөт миэстэтигэр абитуриеннар 37 тыһыынчаттан тахса сайабылыанньаны биэрбиттэр, ол иһигэр бүтэһик нэдиэлэҕэ эрэ сэттэ тыһыынчаны куоһарбыттар. Бу туһунан «Актуальное интервью» биэрии эпииригэр Бүлүүтээҕи профессиональнай-педагогическай колледж дириэктэрэ Алевтина Аргунова кэпсээтэ.
Кини этэринэн, саамай биллэр үөрэх кыһатынан Н.Г. Чернышевскай аатынан Бүлүүтээҕи профессиональнай-педагогическай колледж буолар. Быйыл манна тоҕус хайысханан устудьуоннары ылаллар. Абитуриеннарга педагогика идэтигэр, адаптивнай физическэй култуура, эбии үөрэхтээһин, ону тэҥэ ньиэп-гаас салаатыгар исписэлиистэри бэлэмниир техническэй хайысхалар бааллар. Колледж 257 бүддьүөт миэстэтигэр номнуо 500-тэн тахса сайабылыанньа киирбит.
Билигин үөрэх кыһата федеральнай «Профессионалитет» бырайыакка кыттан, утумнаахтык сайдар. Дьокуускай уонна Нам педагогическай колледжтарын кытары бииргэ үлэлэһэн, үлэ ырыынагар наадалаах исписэлиистэри бэлэмнииллэр. Педагогика хайысхалара мэлдьи саамай киэҥник биллэр идэлэр ахсааннарыгар киирэллэр.
Үөрэх бырагырааматыгар коррекционнай педагогика исписэлиистэрин бэлэмнээһин ураты миэстэни ылар. Бүлүүтээҕи колледж — өрөспүүбүлүкэҕэ соҕотох орто анал үөрэх кыһата, манна логопедтары уонна дефектологтары үөрэтэллэр. Интерактивнай оборудованиелаах аныгы мастарыскыай устудьуоннарга ураты үөрэх наадалаах оҕолору уонна үөрэнэргэ ыарахаттары көрсөр оҕолору кытта үлэлиир практическай сатабыллары иҥэрэр кыаҕы биэрэр.
Сиһилии манна аах.
