Хаҥалас улууһун Хоточчутугар үгүс оттуур сир арыыга баар. От ыйын 9 күнүгэр бастакы паром сорох отчуттар техникаларын туораппыта. Ити кэмҥэ, аны өр курааннаан турбут дэриэбинэҕэ, ардах саҕаламмыта. Ол да буоллар, дьон халлаан туругун көрөн, быыстаан-арыттаан бастакы хотуур суолун түһэрбитэ.
Бааһынай хаһаайыстыба баһылыга Эдуард Варламов арыыга Кэдэгэргэ оттуур. От, былырыыҥҥыга тэҥнээтэххэ, өлгөмнүк үүммүт буолан, настырыанньалаах, күнү былдьаһа, бииртэн-биир урулуону төкүнүтэн барбыта.
«Оттуур сирбит дэриэбинэттэн 15 килэмиэтир ыраах арыыга баар. Быйыл от үүммүт буолан, ардах быыһынан, оту охсон, мунньан, 80-ча урулуону бэлэмнээбиппит. От ыйын 19 күнүгэр ол урулуоннаабыт оппутун барытын уу ылла», — диэн кэпсээтэ кини кэргэнэ Ольга.
Атын хаһаайыстыбалар кытыллааҕы отторугар киирбиттэрэ. Үөһэттэн ардах, аллараттан уу. Отчуттар охсуллубут отторун уу «хаайыытыгар» көрдөрбүтүнэн былдьаттылар. «Кыһыылаах, бу сэлээркэ суоҕуна», — диэн эттилэр.
Хоточчу тула өттө уу. Видеону көрүҥ.
Билигин от ыйын бүтэһик дэкээдэтэ. Хаачыстыбалаах оту ылар кэм бүппүтүн кэриэтэ. Бу уу хаһан түһэн, кууран, эбиитин ньамаҕынан бүрүллүбүт оту хомуйар уустуктаах буолара чахчы. Оттон хоточчулар экэниэмикэлэрэ тыа хаһаайыстыбата, дьон аһын бэлэмнииллэр.
Хоточчуга от ыйын 1 күнүгэр бары хаһаайыстыбаларга 712 сүөһү, ол иһигэр 240 ыанар ынах баар. Сылгы ахсаана 558 төбө.
Уу дэриэбинэ аттыгар эмиэ кэллэ.
838b183a-b82b-45b8-a32d-90869e0cfcaa
