От ыйын 12 күнүгэр Бүлүү улууһун баһылыга Сергей Винокуров нэһилиэктэргэ АЛРОСА дибидиэниттэн көрүллэр субсидияны тыырыы докумуонугар илии баттаата. Бүлүү улууһа улууска тиксэр дибидиэнтэн нэһилиэктэригэр 20 бырыһыаҥҥа диэри үбү көрөр соҕотох улуус буолар. Бу туһунан https://xn--80avakbauqq.xn--p1ai/article/17103 суруйар.
Улууска баар 21 муниципальнай тэриллии нэһилиэктэрэ 130,481.800 солкуобайы тыырсарга эрдэттэн үлэлэстилэр. Улуус дьаһалтатын анал хамыыһыйатыгар сайаапка киллэрэн, онно ирдэнэр докумуоннары чөкөтөн, хас биирдии үлэни бырайыактаан, сорохторугар экспертизалатан дьоһуннаах үлэни ыыттылар.
Бастакы хайысхаҕа – благоустройство салаатыгар нэһилиэктэр бары кытыннылар. Манна 30 000 000 солк. кэруллубутугэр уопсайа 44 444 816 солк. суумаҕа сайаапка киирбит. Онон сибээстээн хамыыһыйа быһаарыытынан 15 нэһилиэк сайаапката бигэргэниллибит.
Социальнай-култуурунай эбийиэктэр материальнай-тэхиниичэскэй хааччыллыыларыгар нэһилиэктэртэн 19 332 075 солк. суумаҕа сайаапка киирбититтэн 15 000 000 солк. тыырылынна. Бу хайысхаҕа көрүллүбүт сууманы таһынан сайаапка киирбитинэн Баппаҕаайы, Бөкчөҥөө, Хаҕын, Үгүлээт нэһилиэктэрэ иккилии сайаапканы киллэрбиттэриттэн хамыыһыйа биир ордук наадалааҕын талан үбүлээһини быһаарда. Онтон Бүлүү куората, Кыһыл Сыыр бөһүөлэгэ уонна Тылгыны нэһилиэгэ докумуоннары киллэрбэтэхтэринэн үбүлээһинтэн маттылар.
Улуус иһинээҕи, нэһилиэк таһымнаах суоллары өрөмүөннүүр үлэлэргэ 28 мөл солк көрүллүбүтэ ыытыллыахтаах үлэлэргэ тиийбэтинэн, хамыыһыйа быһаарыытынан, улуус баһылыга өйөөн, субсидияны 32 000 000 солк. диэри улаатыннарда. Онон хамыыһыйаҕа 15 нэһилиэк киллэрбит сайаапкалара толору үбүлэниилэрин ситистэ.
Төрдүс хайысхаҕа – социальнай-култуурунай эбийиэктэр хапытаалынай өрөмүөннэрэ, саҥардан бэриллэр тутуулар, реконструкция үлэлэрэ киирдилэр. 53 481 800 солк. хамыыһыйа көрөн 11 сайаапканы быһаарда.
Бүлүү улууһугар нэһилиэктэр бары АЛРОСА дибидиэниттэн тиксэннэр, нэһилиэктэрин олоҕун тупсарыыга, сайыннарыыга анаммыт социальнай хабааннаах араас хайысхалаах бырагырааммаларын олоххо киллэрэр кыахтаннылар.
«Дибидиэн үбүн тыырыы Балаһыанньатын» улуус депутаттара бигэргэппитттэрэ. Балаһыанньа быһыытынан муниципальнай тэриллиилэргэ сыллата дибидиэн үбүттэн 20% тиксиэхтээҕэ чопчуламмыта.
