Фронтан төннүбүтүн кэннэ бойобуой дьайыылар бэтэрээннэрэ Юрий Слепцов Дьокуускайга «Защитники Отечества» госфонд филиалыгар эйэлээх олоххо адаптацияҕа көмө көрдүүр. Социальнай сүрүннээччи Елена Бережнова киниэхэ медицинскэй көмөнү, реабилитацияны тэрийэн, сөптөөх өйөбүл дьаһалларын барытын оҥордо.
2026 сыл кулун тутарыгар Юрий социальнай хантараак түһэрсибитэ. Кини бизнес-былааны көмүскээн, ылбыт үбүнэн пилорама атыылаһар. Билигин бэтэрээн нэһилиэнньэҕэ хаптаһын, маһы оҥоруунан дьарыктанар, дьыала бигэ дохуоту аҕалар, өй-санаа туругун тупсарар.
Бэтэрээн бэйэтэ пуонда филиалын өйөөһүн киниэхэ улахан тирэх буолбутун бэлиэтиир:
«Мин пуонда регионнааҕы филиалыгар 2023 сыллаахха сылдьыбытым. Онтон ыла мэлдьи улахан өйөбүлү биллим. Пуонда көмөтүнэн биһиги, бэтэрээннэр, өрөспүүбүлүкэбитигэр уонна Россия үрдүнэн буолар бары событиелары куруук билэбит. Саамай тирээн турар боппуруостары «Аҕа дойдуну көмүскээччилэр» пуонда нөҥүө быһаарабыт. Онон биһигиттэн, АБДь бэтэрээннэриттэн, социальнай сүрүннээччибитигэр уонна пуонда бары үлэһиттэригэр улахан махтал. Кинилэргэ тус олохторугар үтүөнү, доруобуйаны, дьолу-соргуну баҕарабыт!»
Юрий олоҕо үлэнэн муҥурдаммат. Кини кыһамньылаах эр, аҕа уонна эһэ, ону таһынан пуонда филиала ыытар үгүс тэрээһиннэрин көхтөөх кыттыылааҕа. Иллэҥ кэмигэр музыканан үлүһүйэр.
Юрий Слепцов бойобуой суола 2022 сыллаахха саҕаламмыта, анал байыаннай дьайыы зонатыгар көҥүлүнэн барарга быһаарыныы ылыммыта. Разведкаҕабаҕа өттүнэн Хаһаах полкатын састаабыгар сулууспалаабыта, онтон кэлин, 2025-2026 сылларга, иккис төгүлүн инники ккирбиигэ барбыта, пехотнай подразделениеҕа ыытыллыбыта.
Социальнай хантараак түһэрсиэхтэрин сөп АБДь бэтэрээннэрэ, кинилэр кэргэннэрэ, ол иһигэр I эбэтэр II бөлөх инбэлииттээх бэтэрээннэр. Сайабылыанньа биэрэргэ Дьокуускайга «Защитники Отечества» пуонда филиалыгар тиийиэххэ наада, онно исписэлиистэр докумуоннарын ылыахтара, консультация ыытыахтара уонна рекомендация биэриэхтэрэ. Ол кэнниттэн сайабылыанньалааччы докумуоннарын социальнай көмүскэл органнарыгар ыытар. Бүтэһиктээх быһаарыыны биэдэмистибэлэр икки ардыларынааҕы хамыыһыйа ылынар. Наада буоллаҕына бизнес-былааны бэлэмнээһиҥҥэ көмөнү «Мин бизнеһим» киин исписэлиистэрэ оҥоруохтара.
