Санатар эбит буоллахха, бу бэдэрээлинэй таһымнаах куонкуруска Дойду үрдүнэн сүүһүнэн сайаапка киирбититтэн, Саха сириттэн талыллыбыт соҕотох кыайыылаах — биһиги Чурапчыбыт. Бу ситиһии — нэһилиэк салалтатын, архитектордарын уонна көхтөөх олохтоохторун бииргэ үлэлээһиннэрин чаҕылхай туоһута.
Тупсаҕай эйгэ — куттала суох олох төрдө
Бигэргэммит бырайык чэрчитинэн, Куохара үрэх хаҥас кытылыгар аныгы үйэ ирдэбилигэр толору эппиэттиир уопсастыбаннай сир үөскүөхтээх. Манна сынньанарга аналлаах зоналар, успуордунан дьарыктанар былаһааккалар, ону тэҥэ култуурунай уонна дьиэ кэргэнинэн мустан аһыыр-сынньанар миэстэлэр баар буолуохтара.
Бырайыагы олоххо киллэрии сүрүн соруктара:
Инфраструктурата: Уулуссалары сырдатыы, аспаал-бетон бүрүөһүнү тэлгэтии, сатыы киһи сылдьар тротуардарын оҥоруу;
Ландшафтай дизайна: Күөх мастары, талахтары олордуу, газону тэнитии. Үрэх кытылын бөҕөргөтөр инженернэй үлэлэр ыытыллыахтара;
Ыччат уонна успуорт: Сайын ролигынан, скейтынан хатааһылыырга сөптөөх кураанах былаһааккалары, онтон кыһын салааскалыыр сыырдары оҥоруу былааннанар.
Үбэ-аһа уонна тутуллар болдьоҕо
Уопсай бүддьүөт — 55 962 168,65 солкуобайга тэҥнэспит. Мантан 50 мөлүйүөнэ бэдэрээлинэй субсидия быһыытынан кэлбит, ордубут суумма атын источниктартан (өрөспүүбүлүкэ эбэтэр муниципальнай бүддьүөт) көрүллүбүт. Бырайыак үлэтэ 2027 сыл алтынньы 1 күнүгэр диэри түмүктэниэхтээх.
Үлэ бүгүҥҥү күннээҕи хаамыыта
Үлэ номнуо тигинэччи бара турар. Билигин бэдэрээччик тэрилтэ сир үлэтин хайысхатыгар ылсан эрэр. Ол курдук, учаастак сирин тэҥнээһин, ирбэт тоҥҥо дьүөрэлээн буору хаһыы уонна кэлин ол буору атын сиргэ тиэйии-таһыы үлэлэрэ ыытыллаллар.
Бу курдук далааһыннаах үлэ саҕаламмытынан, Чурапчыбыт өссө тупсан, силигилии сайдан иһэригэр, бастатан туран, манна олорор дьон-сэргэ бэйэтэ интэриэстээх. Саҥа кытыл төрөөбүт дойдуга тапталы, бэриниилээх буолууну угуттуур, ыччат айылҕаҕа тахсан эт-хаан өттүнэн чэбдигирэр, кырдьаҕастар сибиэһэй салгынынан дуоһуйа тыынар киин сирдэринэн буоларыгар саарбахтаабаппыт. Айылҕабыт маанылаах үрэҕин кытылын харыстыаҕыҥ, тупсарыаҕыҥ!
Ааптар: Сэмэн Жендринскэй
