Саха сирин тыатын олоҕун, төрүт дьарыгы салҕааччылартан биирдэстэрэ 12 саастаах Сайынаара Саввинова буолар. Кини Үөһээ Бүлүү улууһун Тамалакааныгар олорор, оскуолаҕа үөрэнэр. Кыыс быйыл ат сүүрдүүтүгэр сүрэхтэннэ.
Сайынаара социальнай ситимнэринэн саха дьоно хайдах тыа сиригэр олороллорун, ынах-сылгы иитэллэрин көрдөрөр блогтаах. Кини СИА-ҕа ат сүүрдүүтүн уонна инники былааннарын туһунан сырдатта.
Хаартыска: Ааптар тиксэриитэ
— Ат успуордун эйгэтигэр хайдах киирбиккиний? Ким угуйбутай?
— Акка миигин аҕам Саввинов Александр Семёнович сыһыарбыта. Кини сылгыһыт, дьон сылгытын көрөр-истэр, аһатар-бүөбэйдиир. Оҕо эрдэхпиттэн аҕабын батыһа сылдьан, 5–6 сааспыттан аты миинэргэ үөрэммитим.
— Быйыл ат сүүрдүүтүгэр сүрэхтэниииҥ хайдах ааста? Ханна кытынныҥ?
— Быйыл бастакыбын ат сүүртүм. Иккитэ 4800 миэтэрэ дистанцияҕа «Монгол» диэн аппынан таҕыстым. Бастакыта Үөһээ Бүлүү ыһыаҕар, иккиһэ Ороһу ыһыаҕар. Уһун дистанцияҕа сүүрдэр олус ыарахан эбит, ол эрэн дистанцияларбын иккиэннэрин түмүктээбитим, туораан хаалбатаҕым! Сиэнчэрдэри кытта сүүрбүтүм. Ол мээнэ босхо ыытыллыбат аттары кытта. Оттон мин аппын, Монголбун, бэйэтин таһырдьа кыстатабыт, айылҕа оҕото буоллаҕа. Үөһээ Бүлүүгэ 3-с миэстэ буолбутум.
—Күрэххэ бэлэмнэниигит хайдах ааспытай?
— Биһиги сарсыарда 5 чааска туран аттарбытын эрчийэ, хаамтара барабыт.
— Инникигин хайдах былаанныыгын?
— Өссө да ат сүүрдэр былааннаахпын. Улаатан истэҕим аайы, Монголбуттан ураты атын аттары эмиэ миинэн көрүөхпүн баҕарабын.
— Эн социальнай ситимҥэр блог арыйбыккын. Туох сыаллааххыный?
— Дьон-сэргэ тыа дьоно хайдах олороллорун, тугунан дьарыктаналларын биллиннэр диэн сыаллаах оҥорбутум. Блогпун салгыы сайыннарар былааннаахпын. Билиҥҥи кэмҥэ киһи аһаҕас буолуохтаах, бэйэтин санаатын этиэхтээх дии саныыбын.
Сайынаара курдук оҕолор баар буоланнар, саха норуота үйэлэри уҥуордаан илдьэ кэлбит сылгыны иитии култуурата симэлийбэт. Кырачаан блогер номнуо элбэх киһиэхэ холобур буолла. Киниэхэ өссө үрдүк ситиһиилэри, түргэн сырыылаах аттары уонна блогун ааҕааччыта элбии турдуннар!
Кэпсэттэ: Дайаана Апросимова
