Арктика оройуоннарын ыраах сытар нэһилиэктэрин эминэн-томунан хааччыйыы өрөспүүбүлүкэтээҕи мобильнай биригээдэлэр күүстэринэн уонна көмөлөрүнэн ыытыллар, — диэн регион баһылыгын уонна бырабыыталыстыбатын пресс-сулууспатыгар сигэнэн СИА кэпсиир.
«Олунньуга уонна кулун тутарга Абый, Муома, Дьааҥы, Аллайыаха, Эбээн-Бытантай оройуоннарын киин балыыһаларыгар 230 киилэ эми-тому ыыттылар. Үчүгэйэ диэн эмптэр бары уустук логистическай схемата суох быһаччы улуустарга тиийдилэр. Тиийбит эминэн льготалаах дьон туһаныахтара уонна бу уопуту салгыы оҥоруохпут», — диэн «Сахафармация» салайааччыта Степан Кусатов бэлиэтиир.
«Улуустарга эми ким-туох наадалааҕынан, сайаапкаларынан көрөн ыыттылар», -диэн Саха сирин доруобуйа харыстабылын министиэристибэтин пресс-сулууспатыгар чуолкайдаатылар.
Наадалаах эмтэри Арктика зонатын куһаҕан суоллаах-иистээх, ыраах сытар нэһилиэктэригэр тиэрдээһини, бастакы медицинскэй көмөнү тэрийии чэрчитинэн ыытарга Саха сирин баһылыга Айсен Николаев көҕүлээтэ.
Оройуоннарга тиэрдиллибит эмптэр ураты категориялаах дьону эминэн-томунан хааччыйыы федеральнай бырагыраама испииһэгэр киирэллэр.
