Соторутааҕыта Горнайга СӨ Бырабыыталыстыбатын Бэрэссэдээтэлэ Андрей Тарасенко үлэлээтэ. Андрей Тарасенко салайааччылаах делегация Одуну нэһилиэгэр кэлэн, ууга барбыт оттуур ходуһалары миэстэтигэр тиийэн көрдө, хаһаайыстыбалаах дьону көрсөн кэпсэттэ. СӨ тыатын хаһаайыстыбатын миниистирин солбуйааччы Артем Александров, улуус баһылыга Никита Андреев, Одуну нэһилиэгин баһылыга Владимир Текеянов балаһыанньаны миэстэтигэр билиһиннэрдилэр.
Отторо ууга барбыт хаһаайыстыбалаах дьоҥҥо быйыл хаһааҥҥытааҕар даҕаны кыстыгы туоруулларыгар уустук балаһыанньа үөскээтэ. Атырдьах ыйын ортото буолла да, ардах тохтообокко түһэр. Андрей Владимирович маннык кыһалҕа биһиэхэ эрэ буолбакка, бүтүн регион үрдүнэн баарын бэлиэтээтэ. Онно төрүөтүнэн ирбэт тоҥ ириэриитин түмүгэр ардах түһүүтэ, былырыыҥҥы ойуур баһаарын содула эмиэ буолуон сөбүн эттэ.
Никита Андреев, улуус баһылыга:
– Элбэх оттуур ходуһа ууга былдьанан сытар. Андрей Тарасенко ааспыт сылга баһаарга эмсэҕэлээбит шлюз регуляторы чөлүгэр түһэрэргэ эттэ. Манна туох көмө оҥоһуллуон сөбүн көрөн, этиилэргитин киллэриҥ диэн сорудахтаата.
Улуус үрдүнэн мобильнай биригээдэлэр тэриллэн үлэлэрин саҕалаабыттара. Кинилэр былаан быһыытынан 1800-1900 тн оттуохтара диэн сабаҕалыыбыт. Сыллааҕы былааммытын толорорго уустук балаһыанньа үөскээтэ. Манна СӨ Бырабыыталыстыбата, Тыа хаһаайыстыбатын министиэристибэтин өттүттэн сөптөөх көмө көрүллүө диэн эрэнэбит. Ол да буоллар, төһө кыалларынан хойукка диэри бэйэбит күүспүтүнэн оттуохпутун наада. Быйылгы сылга окко наадыйааччы элбэх, онон от атыылааччы хаһаайыстыбалары көрдүүбүт, атыылаһарга бэлэммит.
Андрей Тарасенко, СӨ Бырабыыталыстыбатын бэрэссэдээтэлэ:
– Быйыл уу чахчы олус элбэх. Тэрээһиннээх хаһаайыстыбалар төһө кыалларынан оттообуттар. Бу ардахтарга от барыта ууга сытар. Бырабыыталыстыба өттүттэн кыстык оту бэлэмнээһиҥҥэ үлэ барарыгар, көмө оҥоһулларыгар сорук турар.
Нэһилиэк олохтоохторо сүбэ мунньахха маннык балаһыанньаҕа хайдах сүөһүнү кыстатар туһунан, оттуур ходуһаларга тиэхиньикэ сылдьыбат буолбутун этиннилэр. Баһаары сэрэтэр туһугар оҥоһуу ардаҕы түһэрэллэрин утаралларын биллэрдилэр. Ынах, сылгы аһын аҕалыыны, тастан от кэлиитин хааччыйалларыгар баҕа санааларын этэн, мунньахха көхтөөхтүк кытыннылар.
Бырабыыталыстыба бэрэссэдээтэлэ кэпсэтии кэмигэр киирбит туруорсуулары өйүүрүн эттэ, Горнайга оҥоһуу ардахтар түспэтэхтэрэ диэн бигэргэттэ. Сүрүн болҕомто оттуур ходуһа сирдэрин оҥорууга, уу мустар сирдэрин босхолооһуҥҥа, мобильнай биригээдэлэри элбэтэр наадалааҕын тоһоҕолоон бэлиэтээтэ.
Түмүккэ Андрей Тарасенко тыа хаһаайыстыбатын миниистирин солбуйааччытыгар Артем Александровка, улуус баһылыгар Никита Андреевка бэйэлэрин этиилэрин киллэрэллэригэр эттэ.
Бырабыыталыстыба саппаас фондатыттан кураантан, ууттан эмсэҕэлээбит улуустарга үп-харчы көрүллэн мобильнай биригээдэлэр тэриллэн учаастактарынан оттууллар. Горнайга билиҥҥитэ 22 мобильнай биригээдэ үлэлиир. Төһө даҕаны уһун ардахтаах буоллар былааны 54,7 % толордулар. Бэрдьигэстээх, Кировскай, Маҥаны нэһилиэктэрэ былааны 75 % тириэртилэр. Сайыҥҥы биир күн дьылы аһатар диэн этии баар. Күн-дьыл турдар эрэ, үлэ балай да кыайтарыа этэ.
Аэлита Андреева
Үлэ күүһэ
