Үөһээ Дьааҥы улууһун Эҥэ нэһилиэгин Сайдыы сэлиэнньэтигэр ыксаллаах быһыы-майгы эрэсиимэ киллэрилиннэ. Бытантай үрэх уутун таһыма эмискэ үрдээбитинэн сибээстээн, быһаарыы ылылынна. Киэһэ 22:40 чааска уу таһыма 1076 см тиийдэ, 1,5 чаас иһигэр 1 см түстэ. Кутталлаах кээмэй – 804 см саҕаланар.
Бүгүн, от ыйын 23 күнүгэр, киэһэ буолбут быһылааннары-көстүүлэри туоратар үлэни-хамнаһы ыытарга уонна көмөнү сүрүннүүргэ анаан Үөһээ Дьааҥытааҕы көрдүүр-быыһыыр этэрээт Суордаах сэлиэнньэтиттэн Сайдыыга көстө. Быыһааччылары Ми-8 бөртөлүөтүнэн «Полярные авиалинии» авиахампаанньа тиэртэ.
Авиация ону таһынан гуманитарнай көмөнү тиэйиигэ уонна олохтоохтору эвакуациялыырга туһанылынна. Баатаҕайтан Сайылыкка 1290 кг гуманитарнай таһаҕас тиэрдиллибит. Бөртөлүөт иһэр ууну, аһы-үөлү, үс электростанцияны уонна ууну оборторорго анаммыт үс помпаны аҕалла. Сайдыы — Баатаҕай маршрутунан 18 киһи, ол иһигэр 8 оҕо аҕалылынна.
Үөһээ Дьааҥытааҕы ПСО начаалынньыга Егор Слепцов эппитинэн, билигин Сайдыы сэлиэнньэтигэр быстах кэмҥэ олордор пууҥҥа 21 киһи баар, ол иһигэр түөрт оҕо. Сарсын сарсыардаттан быыһааччылар тиэргэннэринэн үлэҕэ турунуохтара, олохтоохторго гуманитарнай көмөнү ылалларыгар көмөлөһүөхтэрэ диэн, Саха сирин быыһыыр сулууспата МАХ-ханаала суруйар.
