РФ Роспотребнадзорун салайааччыта Анна Попова 2024 cыл тохсунньу 1 күнүгэр диэри оскуолаларга, уһуйааннарга уонна ыччат түмсүүлэригэр хааччахтааһыны уһатта. Кини уурааҕа официальнай интэриниэт-порталга тахсыбытын туһунан Интерфакс иһитиннэрэр.
Оскуолаларга, успуорт тэрилтэлэригэр, ону сэргэ, аэропуортарга, атыы-эргиэн кииннэригэр сабыылаах тэрээһиннэр бобулуннулар. Арай, орто анал уонна үрдүк үөрэх кыһаларыгар, эбии үөрэхтээһин тэрилтэлэригэр сымнатыы баарын иһитиннэрдэ.
Оскуолаларга уонна уһуйааннарга күннэтэ санитарнай ирдэбили тутуһан сууйуу-сотуу, дьиэ иһин салгылатыы, оҕолор, үлэһиттэр эттэрин суоһун бэрэбиэркэлээһин ирдэбилэ уһатылынна. Оҕолор үөрэнэр бириэмэлэрин учуоттааһын, бэйэ-бэйэлэрин кытта алтыһыыларын аҕыйатыы уонна хас биирдии кылааска туспа тус кэбиниэти көрүү туһунан ирдэбили туруорда.
Ааптар: Ульяна Захарова, edersaas.ru
