«Ил Дархан көҕүлээбит бырайыага ыраах сытар улуустарга олус наадалааҕын көрдөрдө. Отчуоттар кэмнэригэр элбэх махтал этилиннэ мобильнай быраастар үлэлэригэр», — диэтэ миниистир Лена Афанасьева.
Олунньу 10 күнүттэн педиатр, эндокринолог, акушер-гинеколог, офтальмолог, травматолог-ортопед, УЗИ бырааһа, отоларинголог, невролог уонна уролог Өлөөҥҥө көрөр. Бүгүҥҥү күҥҥэ 639 оҕо Ээйиккэ, Дьилиндэҕэ, Харыйалаахха уонна Өлөөҥҥө көрдөрдө.
Улахан дьону көрөр биригээдэ Орто Халымаҕа олунньу 27 күнүгэр диэри үлэлиир. 488 киһи көрдөрдө. Былааҥҥа Ойуһардаах, Эбэх, Сылгы-Ыытар, Өлөөкө-Күөл, Арҕахтаах уонна Сыбаатай бааллар.
Өссө биир биригээдэ олунньу 15 күнүттэн Аллайыахаҕа үлэлиир, Чкаловка, Нычалаахха, Оленегорскайга уонна Русское Устьеҕа сырыттылар, салгыы киин балыыһаҕа үлэлиэхтэрэ, кулун тутар 1 күнүгэр диэри.
Кэбээйигэ терапевт, педиатр, эндокринолог, кардиолог, акушер-гинеколог, офтальмолог, УЗИ бырааһа, травматолог-ортопед, отоларинголог уонна невролог үлэлииллэр, Сииттэҕэ уонна Батамайга сырыттылар. Бу күннэргэ Сиэгэн-Күөлүгэр уонна Сэбээн-Күөлүгэр барыахтара, кулун тутар 1 күнүгэр диэри дьону көрүөхтэрэ.
Эбээн Бытантайга оҕо доруобуйатын көрөр биригээдэ үлэлиир, педиатр, эндокринолог, кардиолог, акушер-гинеколог, офтальмолог, УЗИ бырааһа, отоларинголог, невролог уонна психиатр. 129 оҕо көрдөрдө. Салгыы Дьарҕаалаах, Кустуур уонна Саккырыыр. Олунньу 27 күнүгэр диэри үлэлииллэр.
Сотору кэминэн мобильнай быраастар Өймөкөөн уонна Уус Майа улуустарыгар барыахтара.
