«Сэрии оҕотун», үлэ бэтэрээнин Молдожан Кылычеву Улуу Кыайыы 81- сылынан Хаандыга бөһүөлэгэр скандинавскай хаамыынан дьарыктанар дьахталлар бөлөхтөрө эҕэрдэлээтэ. 88- с саастаах кырдьаҕаска открытка уонна ас набора туттардылар, урукку кэмнэри аҕыннылар.
Молдожан Багашарович 1938 сыллаахха Киргизия Иссык-Куль уобалаһын Түп оройуонугар төрөөбүт. Сэттэ оҕолоох ыалга кини убайын кэнниттэн иккис.
Саха сиригэр Хаандыга бөһүөлэгэр Молдожан Кылычев 1962 сыллаахха кыс ортотугар — тымныы ахсынньы ыйга кэлбит. Табаһыт эбээннэр түөлбэлээн олорор Томпо сэлиэнньэтигэр икки этээстээх дьиэ туппуттар.
«Кириэс Халдьаайыга доҕотторум ыһыахха ыҥырбыттара. Онно кэргэммин Агафьяны кытта билсибитим. 1964 сыл күһүнүгэр ыал буолбуппут. Үчүгэйдик олорбуппут уонна дьэ арахсыбыппыт (кэргэнэ олохтон барбытын этэр). Сахалыы саҥарарга дьону кытта икки сыл ону -маны буккуйан-таккыйан үөрэммитим. Үөрэнэр киһи начаас үөрэнэр, баҕарбат киһи хаһан баҕарар саҥарбат. Эргэ Томпо сэлиэнньэтигэр, онтон Тополинайга өр олорон кыратык эбээннии билэбин. 13 сыл суоппардаабытым. Араас массыыналарга үлэлиир этим. Большой Невергэ, Амурскай уобаласка айанныырым. Хаандыгаҕа 1987 сыллаахха көспүппүт. Араас тэрилтэлэргэ үлэлээбитим бары банкрот барбытара»,- диэн уу сахалыы Молдожан Багашарович кэпсиир.
Бэтэрээн кэргэнинээн үс оҕону улаатыннарбыттара. Игирэ уолаттара олохтон эрдэ барбыттара. Кыыһа дьиэ кэргэнин кытта Дьокуускайга олорор.
Молдожан Багашарович оҕуруотунан дьарыктанар. Оҕурсу, помидор, моркуоп, редискэ, салат, укроп олордор. Хортуоппуйа кыһыны туоруурга тиийэр. «Помидордарым бары «Якуттар» (суорт аата), үчүгэй, бытархай эрээри элбэх астаах. «Монгольский карлик» диэн баар. Урут «Белый налив» олордор этибит. Хортуосканы сайдыылартан ылбытым. Оҕо сылдьан оҕуруокка үлэлиир этим, онон билэбин,- диир кырдьаҕас. Молдожан Багашарович ыам ыйын 1 күнүгэр төрөөбүтэ. Быйыл 88 сааһын туолла. Онон ыам ыйдааҕы бырааһынньыктар киниэхэ күндүлэр.
Скандинавскай хаамыы бөлөҕүн дьахталлара Молдожан Багашаровиһы Улуу Кыайыы күнүнэн эҕэрдэлээтилэр. Дойдутун Киргизияны санатар оҕуруот аһын, фруктаны, бэйэлэрэ астаабыт саха баахылатын, барыанньалары, туустаах уонна ыһаарыламмыт балыгы, куһу уонна да атыны кыттыһан биэрдилэр. Кинилэр бэйэлэрин баҕаларынан уруккуттан Молдожан Багашаровиһы өйүүллэр. Бырааһынньыкка ас атыылаһан эбэтэр астаан аҕалааччылар, оройуон хаһыатын суруттаран биэрээччилэр, СИА-ҕа суруйда Евдокия Неустроева.
