Ыам ыйын 9-11 күннэригэр Саха сиригэр Красноярскай кыраайтан циклоннар дьайыыларыттан халлаан туруга мөлтүүрүн эттилэр. Кэккэ улуустарга уонна Дьокуускайга сөҥүү, эмискэ тымныйара күүтүллэр. Ыам ыйынааҕы өрөбүллэр хайдах буолуохтарай, ЯСИА-ҕа Саха УГМС метеорологическай уонна агрометеорологическай билгэлээһиннэргэ отделын начаалынньыга Саргылана Никитина иһитиннэрдэ.
«Чугастааҕы сууккаҕа арҕаа уонна киин улуустарга сөҥүү күүтүллэр, күнүс Кэбээйи оройуонугар сорох сирдэринэн күүстээх. Арҕаа улуустарга тыаллаах, күүһүрэр кэмигэр 15-20 м/с диэри буолар. Өрөбүлгэ тымныы фронт ааһан, киин улуустарга сөҥүү түһүө, оттон сорох сирдэринэн соҕуруу уонна илин улуустарга сөҥүүтэ күүстээх буолуоҕа. Ыам ыйын 9 күнүгэр Дьокуускайга түүн үксүн сөҥүү суох, салгын температурата +2-тэн +4 кыраадыска диэри. Күнүс орто ардах күүтүллэр, хотугулуу-арҕаа тыал, күүһүрэр кэмигэр 9-14 м/с түргэннээх. Ити эрээри халлаан сылаас, +13…+15 кыраадыс», — диэн ЯСИА-ҕа Саргылана Никитина кэпсээтэ.
Киин улуустарга уонна Дьокуускайга өрөбүл күнтэн температура эмискэ намтыырын сэрэттилэр. Ыам ыйын 12 күнүттэн эрэ сылыйыаҕа.
«Өрөбүл уонна бэнидиэнньик күннэригэр арҕаа, киин улуустарга уонна Дьокуускайга сөрүүн, тыаллаах күн-дьыл күүтүллэр. Күнүс салгын температурата +6… +8 кыраадыска диэри эрэ буолуоҕа, тыал тэтимнээх, 9-14 м/с диэри.
Өрөспүүбүлүкэ үрдүнэн кэриэтэ ыам ыйынааҕы өрөбүллэргэ Красноярскай кыраай хоту өттүттэн циклоннар сабыдыалларынан сөрүүн күн-дьыл күүтүллэр. Халлаан туруга оптуорунньуктан уларыйыаҕа: ыам ыйын 12 күнүгэр кииҥҥэ уонна Дьокуускайга эмиэ +10… +13 кыраадыс», — диэн Саргылаана Никитина бэлиэтээтэ.
