Саха Өрөспүүбүлүкэтэ уонна Кыргызстан Өрөспүүбүлүкэтин Бырабыыталыстыбатын кабинета бииргэ үлэлэһии туһунан сөбүлэһиигэ илии баттаатылар. Бу туһунан Ил Дархан Айсен Николаев МАХ-ханаалыгар иһитиннэрдэ.
Санк-Петербургтааҕы норуоттар икки ардыларынааҕы экэниэмикэ пуорумун кэмигэр Айсен Николаев Кыргызстан Бырабыыталыстыбатын Бэрэссэдээтэлин бастакы солбуйааччыта Данияр Амангельдиевы кытта көрүстэ. Көрсүһүү түмүгүнэн икки өрөспүүбүлүкэ бииргэ үлэлэһиилэрин туһунан сөбүлэһиигэ илии баттанна.
«Докумуон биһиги сыһыаммытыгар саҥа кэми арыйар уонна инникитин бииргэ үлэлэһэр бырайыактары сайыннарарга тирэх буолар», — диэн тоһоҕолоон бэлиэтээтэ Айсен Николаев.
«Бүгүн биһиги хардарыта үлэбитин утумнаахтык кэҥэтэбит. Эргиэн улаатар, урбаанньыттар икки ардыларыгар сибээс бөҕөргүүр, бииргэ үлэлэһии саҥа кыахтара үөскүүллэр. Саха сирэ Кыргызстан Өрөспүүбүлүкэтиттэн тыа хаһаайыстыбатын уонна оҕуруот аһын бородууксуйатын тиэйиини кэҥэтиигэ, инвестициялааһыҥҥа уонна дьыалабыай сибээстэри сайыннарыыга, барыстаах көҕүлээһиннэри олоххо киллэриигэ интэриэстээх. Култуурунай уонна спортивнай бииргэ үлэлэһиигэ туспа болҕомтону уурдубут.
Сөбүлэһиигэ илии баттаммыта доҕордоһууну уонна партнердуу сыһыаны салгыы бөҕөргөтүүгэ үчүгэй тирэх буолуо диэн эрэллээхпин», — диэн суруйда Саха сирин баһылыга МАХ мессенджеригэр.
