ПМЭФ былаһааккатыгар «Якутия» авиахампаанньа Уһук Илиҥҥэ уонна Арктикаҕа салгынынан сырыыны сайыннарыы туһунан «Объединённая авиастроительная корпорация» (ОАК) публичнай акционернай уопсастыбаны кытта сөбүлэһиигэ илии баттанна.
Сөбүлэһии чэрчитинэн, «Якутия» авиахампаанньаҕа алта Ту-214 уонна биэс SJ-100 сөмөлүөттэри тиэрдиэхтэрэ. Сөмөлүөттэри 2027 сыл иккис аҥаарыттан саҕалаан, 2030 сылга диэри туруоруохтара. Дьиҥэр, бу өрөспүүбүлүкэ авиахампаанньатын флотун киэҥ хабааннаах саҥардыытыгар киирии буолар.
Саха сиригэр, авиация тырааныспар тиһигин төрдө буоларын быһыытынан, бу быһаарыы стратегическай суолталаах. Биһиги авиацияны сайыннарыы саҥа моделын олохтоон, салгын логистикатын бөҕөргөтөбүт уонна өрөспүүбүлүкэ Арктикатааҕы оройуоннарын уонна бүтүн Уһук Илин транспортнай хааччыллыытын үрдэтэбит, диэн Ил Дархан Айсен Николаев МАХ ханаалыгар суруйда.
