Кэлэр 2032 сылга, тус сыаллаах көрүүнэн 2050 сылга диэри өрөспүүбүлүкэ социальнай-экэнэмиичэскэй сайдыытын тосхолун туһунан олохтоох сокуон хайдах туолан иһэрин истэргэ Ил Түмэҥҥэ бырабыыталыстыба чааһыгар сүрүн дакылааччыттары истэн баран норуот дьокутааттара ыйытыктары биэрдилэр, суруйда Саха парламент саайт.
Кинилэр Аартыка улуустарыгар салгын тырааныспарын тарыыбын кыччатыы, тыа сиригэр олорор, кэккэ ыарыылаах дьону босхо эминэн, быраастарынан хааччыллыы, оскуолаҕа реабилитологтар, адаптивнай физичэскэй култуура үлэһиттэрэ тиийбэттэрин туһунан о.д.а. ыйытыктары биэрдилэр.
Тустаах министиэристибэ үлэһиттэрэ хас биирдии ыйытыкка хоруйдаатылар. СӨ Экэниэмикэтин миниистирэ Петр Попов быһааран биэрбитинэн сөмөлүөттэр эргэрэн, ону оҥосторго үтүмэн үп-харчы барар, ол тарыыпка эмиэ охсор. Дойдуга саҥа көтөр ааллары оҥороллорун күүтэ сатаан баран АН-24 курдук Кытай сөмөлүөттэрин аҕаларга кэпсэтии бара турарын бэлиэтээтэ.
Мунньаҕы түмүктүүргэ Ил Түмэн бэрэссэдээтэлин солбуйааччы, бүддьүөккэ, үпкэ-харчыга, түһээҥҥэ уонна сыана бэлиитикэтигэр, бас билии, приватизация боппуруостарыгар сис кэмитиэт бэрэссэдээтэлэ Юрий Николаев сарсын дуоллар, ньиэп сыаната хайдах буолара биллибэт халбаххай кэмигэр 2050 сылга диэри өр кэмнээх былааны чопчулааһын кэккэ уустуктардааҕын эттэ.
Биир өттүнэн былаана суох олорор эмиэ табыллыбат, ол иһин тосхолу саҥардар уолдьаспытын иһитиннэрдэ. Кини бары көрдөрүүнэн ситиһиилээх курдукпут эрээри, ис дьиҥэр олохпут тупсубатаҕын, кыһалҕа эбиллибитин, онон тосхол сорох өрүтэ итэҕэстэрдээҕин санатта.
«Бастакытанан, сир баайын хостооһун үрдээтэ эрээри, бородууксуйаны оҥорон таһаарбаппыт. Эрэгийиэн баалабай бородууксуйатын 57% айылҕа баайын хостооһун, ону таҥастааһын сыал-сорук быһыытынан тосхолго киириэхтээх дии саныыбын.
Иккиһинэн, мэдиссиинэ үлэһиттэринэн хааччыллыыга быраастар Бурятияттан, Орто Азияттан кэлэллэр. Дьокуускайга миэдиктэри бэлэмниир үнүстүүт баар эрээри, дьоммут тоҕо үлэлии барбаттарый? Бары салааҕа бэйэбит үлэһиттэрбитин үлэнэн хааччыйыахтаахпыт», — диэтэ Юрий Николаев.
Экэниэмикэҕэ, инвестиционнай уонна бырамыысыланнай бэлиитикэҕэ сис кэмитиэт бэрэссэдээтэлэ Павел Петров тосхолу көрүү бастакы түһүмэҕэ түмүктэммитин, дьокутааттар этиилэрин учуоттаан, өссө саҥардан, тупсаран, чочуйан биэрэн, ону кэлэр пленарнай мунньахха киллэрэллэрин туһунан эттэ.
