29 Кулун тутар 29.03
  • -15°
  • $ 92,26
  • 99,71

Олимпийскай чөмпүйүөн Никита Крюков: Спордунан дьарыктаныҥ

17:35, 10 апреля 2017
Текст:
Читайте нас на
Яндекс Новости
ЯДВ

“Юность” стадиоҥҥа Саха сирин бастыҥ хайыһардьыттарын “Гонка звезд” диэн күрэхтэһиилэрэ үһүс сылын ыытылынна. Күрэхтэһии балаһыанньатын быһыытынан, иккилии спортсмен пааранан эстафета курдук солбуйса сылдьан стадиону үстүүтэ эргийдэ. Уопуттаах маастардартан уонна саҥа тахсан эрэр талааннаах хайыһардьыттартан талыллыбыт 12 паара илин-кэлин түһүстэ. Барыллааһын күрэхтэһии кэнниттэн кинилэртэн алта бастыҥнара, үчүгэй бириэмэни көрдөрбүттэрэ быһаарыылаах түһүмэххэ күрэс былдьастылар.  


Кылгастык пааралары билиһиннэрдэххэ: Никита Крюков (Алдан-Москва) уонна Илларион Захаров (Таатта), Александр Клуген (Ленскэй) уонна Никита Макаров (Дьокуускай), Егор Моссоенов (Дьокуускай) уонна Никита Веретельников (Алдан), Андрей Николаев (Өлүөхүмэ) уонна Алексей Васильев (Дьокуускай), Ярослав уонна Даниил Котлярчуктар (Ленскэй), Иван Пальцев (Алдан) уонна Николай Зыков (Мэҥэ Хаҥалас), Дмитрий Егоров уонна Константин Шубин (иккиэн Хаҥаластан), Николай Чуфистов (Нерюнгри) уонна Филипп Аммосов (Дьокуускай), Петр Тайшин (Дьокуускай) уонна Никита Шестаков (Амма), Маркел Федулов (Өлүөхүмэ) уонна Антон Дегесов (Ленскэй), Петр Троев (Уус Алдан) уонна Андрей Коконкин (Ленскэй), Максим Колодезников (Дьокуускай) уонна Владимир Рыбкин (Ленскэй) буолан сүүрдүлэр.

«Гонка звезд» күрэхтэһиини үөрүүлээхтик аһыы.

Барыллааһын күрэхтэһии кэнниттэн кинилэртэн Крюков-Захаров паарата 8 мүн. 58,07 сөк. бириэмэни көрдөрөн, инники таҕыста. Ити курдук, Николаев-Васильев (9.14,16), Моссоенов-Веретельников (9.19,99), Клуген-Макаров (9.21,07), Колодезников-Рыбкин (9.17,43), Тайшин-Шестаков (9.20,93) бириэмэни көрдөрөн, финалга киирэр кыахтаннылар.

Күрэхтэһии чэрчитинэн олимпийскай чөмпүйүөн, аан дойду күрэхтэһиитин үс төгүллээх кыайыылааҕа Никита Крюкову уонна Россия күрэхтэһиитигэр ситиһиилээхтик кыттыбыт спортсменнары чиэстээһин тэрилиннэ. Ону тэҥэ, финал иннинэ Никита Крюков хайыһардьыт оҕолорго маастар-кылаас тэрийдэ. Тэрийээччилэр этэллэринэн, онно киин куорат оскуолаларыттан уонна Алдаҥҥа, өрөспүүбүлүкэ күрэхтэһиитигэр бараары сылдьар илин эҥээр улуустарын эдэр хайыһардьыттара, барыта 300-чэкэ оҕо кытынна.

Никита Крюковка аан дойдуга чөмпүйүөннээбитин иһин сертификат туттарылынна.

Дьэ, онтон финал саҕаланна. Хайыһардьыттар трибуна иннинэ тыал курдук көтөн кэриэтэ ааһаллар. Хайыһардарын тыаһа сып-сыыгынас, хаалыктарынан сэниэлээхтик анньынан – хаар элэҥнэс. Манна даҕатан эттэххэ, бу күн спорду таптааччылар чахчы да, бастыҥ хайыһардьыттар күрэхтэһиилэрин көрөн улахан дуоһуйууну ыллылар. Финалга пааралар эмиэ солбуһа сылдьан стадиону үстэ эргийдилэр. Онуоха, этэргэ дылы, олимпийскай чөмпүйүөнү отунан-маһынан оҥорбоккун, Никита Крюков Тааттаттан 11-с кылаас үөрэнээччитэ Илларион Захаровтыын эрэллээхтик бастаатылар. Кинилэр бу сырыыга 8 мүн. 56,74 сөк. бириэмэни көрдөрдүлэр. Көрбүккүт курдук, бу иннинээҕи көрдөрүүлэрин биир мүнүүтэнэн тупсардылар. Аан дойду ааттааҕын кытта биир паараҕа сүүрбүт эдэр уол түһэн биэрбэтэ. Бу кыайыыттан Илларион санаата өссө бөҕөргөөн, этэргэ дылы, хараҕа уоттанан, өссө ситиһиилээхтик кыттарыгар кыах үөскээтэ.

Иккис миэстэҕэ Максим Колодезников уонна Владимир Рыбкин (9.11,11) таҕыстылар. Оттон үһүс бириистээх миэстэни Андрей Николаев уоннаАлексей Васильев (9.16,29) ыллылар. Салгыы миэстэлэри Клуген-Макаров, Моссоенов-Веретельников, Тайшин-Шестаков пааралара үллэһиннилэр.

Пьедесталга — кыайыылаахтар.

Үчүгэй күрэхтэһии. Састаап күүстээх, — диир олимпийскай чөмпүйүөн Никита Крюков. – Трассаны үчүгэйдик оҥорбуттар. Сарсыарда эрчиллиигэ сир өссө тоҥ буолан, мууһуран, хайыһар халтарыйа сылдьара, оттон билигин син ирэн, сүүрэргэ үчүгэй буолбут. Бэйэм санаабар, барыллааһын күрэхтэһиигэ Александр Клуген уонна ити Егор Моссоеновы кытта сүүрбүт эдэр уол (Никита Веретельников – П.П.) үчүгэй өйдөбүлү үөскэттилэр. Финалга кинилэр кутталлаах этилэр. Ол эрээри, Илларион түһэн биэрбэтэ, бэркэ сүүрдэ. Онон эрэллээхтик кыайдыбыт. Ыалдьааччыларга барыларыгар махтал, төһө эмэ үлэ күнэ буоллар, биһигини өйүү кэлбиттэрин иһин. Төһө кыалларынан, кинилэргэ дуоһуйууну, спорт бырааһынньыгын үөскэтэ сатаатыбыт. Барыларыгар чэгиэн доруобуйаны уонна ситиһиилээх буолууну баҕарабын. Спордунан дьарыктаныҥ! – диэтэ.

Аны, Никита Крюков уонна күрэхтэһиигэ кыттыбыт атын хайыһардьыттар Алдаҥҥа тиийэн өрөспүүбүлүкэ чөмпүйэнээтигэр кыттыахтара.

www.edersaas.ru

Следите за самым важным и интересным в Telegram-канале и WhatsApp-группе ЯСИА