Саха сиригэр Арктика оҕолоругар көмө кээмэйэ ааспыт сыл таһымыгар хаалла. 10 мөлүйүөн солкуобайы кинилэр өрөспүүбүлүкэ тас өттүгэр күрэхтэһиилэргэ, олимпиадаларга, куонкурустарга уонна да атын тэрээһиннэргэ сырыыларыгар аныахтара. Ол туһунан www.sakha.gov.ru сайт иһитиннэрэр.
Арктика зонатыгар олорор оҕолору үөрэтиигэ, иитиигэ, сынньатыыга уонна толору сайыннарыыга усулуобуйаны тэрийии судаарыстыба инники туруорар соруга буолар — бу хайысханы Россия президенэ Владимир Путин хаста да бэлиэтээбитэ. Саха сирин баһылыга Айсен Николаев Ил Түмэҥҥэ суругар Арктика оройуоннарын бюджеттарын ыстатыйаларын көмүскээһин туһунан эппитэ.
2025 сыллаахха «Арктика Оҕолоро» региональнай бырайыак чэрчитинэн оскуола оҕолорун айаннарын тэрийиигэ 10 мөл.солк. көрүллүбүтэ. Бу үбүнэн Аллайыаха, Абый, Анаабыр, Дьааҥы, Үөһээ Халыма, Эдьигээн, Муома, Орто Халыма, Аллараа Халыма уонна Өлөөн оройуоннарыттан 109 оҕо регион тас өттүгэр ыытыллыбыт тэрээһиннэргэ кыттар кыахтаммыта.
Оҕо айар кэлэктииптэрэ бу кээмэйинэн биллэр куонкурустарга ситиһиилэммиттэрэ. 2025 сыллаахха Абый оройуонун Кэбэргэнэ сэлиэнньэтиттэн «Нёчэ» ансаамбыл бэһис төгүлүн Казань куоракка «Арт‑содружество» норуоттар икки ардыларынааҕы бэстибээлгэ гран-при ылбыта, улахан сценаҕа ураты эбээн култууратын көрдөрбүтэ. Онно бэйэлэрин талааннарын Аллайыаха улууһун Оленегорскай сэлиэнньэтиттэн «Илик» ансаамбыл эмиэ көрдөрбүтэ.
«Казань куоракка аан дойдутааҕы «Арт-содружество» бэстибээл – талааннаах оҕолор бэстибээллэрэ, эдэр дьоҕурдарга улахан сценаҕа бэйэлэрин көрдөрөр кыаҕы биэрэр ураты тэрээһин. Бэстибээл эдэр артыыстары талааннарын киэҥ аудиторияҕа арыйарга көҕүлүүр уонна салгыы сайдыыга саҥа саҕахтары арыйар. Биһиги ураты эбээн култууратын улахан сценаҕа билиһиннэрдибит, Гран-при ыллыбыт. Бэстибээл хас биирдии кыттыылааҕа сыаната суох уопуту ылбыта, норуоттар култуураларынан байбыта уонна үйэтин тухары чаҕылхай ахтыылары хаалларбыта», – диэн кэпсээтэ «Нёчэ» ансаамбыл салайааччыта Альбина Соломова.
«Нёчэ» ансаамбыл оҕолорун төрөппүттэрэ «Арктика Оҕолоро» бырагыраама үп-харчы өттүнэн өйөбүлүн, оҕолор айар кыахтарын олоххо киллэрэр кыахтаахтарын иһин махталларын биллэрдилэр.
«Былырыын «Арктика Оҕолоро» бырагыраама өйөбүлүнэн биһиги уолаттарбыт Казань куоракка “Арт‑Содружество » аан дойдутааҕы куонкурус-бэстибээлгэ сылдьан Гран‑при аҕалбыттара. Биһиги дьоҕус Майыарбыт оскуолатыгар бу историческай кэриэтэ тэрээһин. Бу ыраах сытар оҕолорго дьиҥнээх кыах, биһиги ыарахан дэриэбинэбититтэн тахсан, саҥа куораттары бэйэбит харахпытынан көрөн, доҕотторбутун булан-талан ылыы — бу бырайыак сыаната суох үлэтэ итиннэ сытар. Хотугу сир аҕыйах ахсааннаах төрүт омуктарын култуураларын маннык үрдүк таһымҥа өйөөбүккүт иһин махтал. Бырагыраама салгыы да саҥа «сулустар» талааннарын уматыахтын, – дииллэр ансаамбыл оҕолорун төрөппүттэрэ.
