Саха сирин Арктикатын зонатын бары эргиэн-логистика кииннэригэр (ТЛЦ) билигин «АрктикВкус» брендынан олохтоох оҥорон таһаарар эт кэнсиэрбэтин атыылаһыахха сөп. «Арктическай эргиэн-логистика хампаанньата» бородууксуйа баартыйатын кыһыҥҥы суолунан тиэрдибитэ.
Ыарахан суоллаах-иистээх Арктика оройуоннарыгар нэһилиэнньэ олоҕун хаачыстыбатын үрдэтии — Россия президенэ Владимир Путин бэлиэтээбит биир тутаах соруга.
Саҥа дьаһал хотугу улуустар олохтоохторугар интэриэһи үөскэттэ. Эт кэнсиэрбэтин ордук Абый, Аллараа Халыма уонна Уус-Дьааҥы улуустарыгар көхтөөхтүк атыылаһаллар — бу оройуоннар атыы-эргиэн кээмэйинэн лидердэр буоллулар.
«Бүгүҥҥү күҥҥэ биир бааҥка олохтоох оҥорон таһаарыллыбыт эт кэнсиэрбэтин сыаната 221 солк.тэҥнэһэр. Чэпчэки сыана сырьену урукку сыананан атыылаһыллыбытын кытта сибээстээх», — диэн хампаанньаҕа быһаардылар.
АТЛК эппитинэн, хоту дойду дьоно олохтоох оҥорон таһаарар хаачыстыбалаах бородууксуйаҕа наадыйыылара үрдүгэ, кэнсиэрбэни сыаналыылларын бигэргэтэр.
Арктиканы кэнсиэрбэ бородууксуйатынан хааччыйыыга туһуламмыт «АрктикВкус» сыах 2025 сыллаахха аһыллыбыта. Кини үлэтэ сырьену көдьүүстээхтик оҥорон таһааран уонна тырааныспар хотугу улууска айанныырыгар тиэйиини-таһыыны хааччыйарга көмөлөһөр.
Саха сирин баһылыга, «Биир Ньыгыл Россия» баартыйа Саха сиринээҕи региональнай салаатын сэкиритээрэ Айсен Николаев бырайыак суолтатын тоһоҕолоон бэлиэтээтэ: сыах тыа хаһаайыстыбатын бородууксуйатын оҥорон таһаарыы уонна логистика тиһигэр улахан суолталаах звено буолуоҕа. Оҥорон таһаарыыга Арктика улуустарыттан айылҕа отонун туһаналлар, оттон хоту улуустар илин эҥэр улуустар бөлөхтөрүн аграрийдарын переработкаламмыт бородууксуйалара кэлэр — ол курдук быһаарыллыбыт ситим тутуллар.
ТЛЦ ситимин сайыннарыы Саха сирин баһылыга Айсен Николаев «О Стратегии социально-экономического развития Арктической зоны Республики Саха (Якутия) на период до 2035 года» стратегическай ыйааҕынан уонна өрөспүүбүлүкэ бырабыыталыстыбатын уонна Россия Илин сайдыытын Министиэристибэтин икки ардыларыгар сөбүлэһиинэн барар.
