18 Ыам ыйа 18.05
  • -7°
  • $ 104,68
  • 115,6

Өлүөхүмэҕэ суолу аспаалынан бүрүйүөхтэрэ дуо?

11:20, 19 февраля 2020
Текст:

Өлүөхүмэ оройуонугар СӨ бырабыыталыстыбатын отчуота олохтоохтору түмтэ. Бырабыыталыстыба бэрэссэдээтэлэ Владимир Солодов бэйэтин «Инстаграмҥа» страницатыгар быһа эпииргэ отчуоту көрдөрдө.


Быйылгы Олоҥхо ыһыаҕа Өлүөхүмэҕэ ыытыллар. Саамай сүрүн тэрээһин буоларын Владимир Солодов бэлиэтээтэ. Кини ааспыт сыл түмүгүнэн Сахабыт сирэ үгүс хайысхаларга үрдүк ситиһиилээҕин бэлиэтээтэ.

Бырабыыталыстыба бэрэссэдээтэлэ Өлүөхүмэ оройуона сайдыыттан хаалсыбакка иһэрин, бу соторутааҕыта көмпүүтэринэн томография өҥөтүн оҥорор кабинет арыллыбытын, 114 социальнай хантараак түһэрсиллэн бар дьон туһугар хайысхаламмытын эттэ. Ол курдук оҕо босуобуйата үрдээбитин, ийэ хапытаала бастакы, иккис, үһүс оҕоҕо бэриллэр буолбута дойду дефографиятын боппуруоһун тупсарар туһугар туһаайбытын ыйда.

Өрөспүүбүлүкэҕэ хаарбах дьиэ кыһалҕата аҕыйах сылынан суох буолуоҕун, 2020-2024 сылларга дьону толору хааччыллыылаах дьиэнэн хааччыйыы боппуруоһа быһаарыллыаҕын кэпсээтэ. Икки бырыһыаннаах ипотека тыа сиригэр сааһынан хааччаҕа суох бэриллэрин, «Туймаада Агроснаб» тэрилтэни кытта дуогабардаһан хортуоппуй үүннэриитин күүскэ сайыннарыыга болҕомто ууруллуоҕун, олохтоох нэһилиэнньэҕэ бэйэ дьыалатын аһыы күүһүрүөҕүн, үлэ миэстэтэ тыа хаһаайыстыбатын салаатыгар элбиэҕин билиһиннэрдэ.

Владимир Солодов отчуоттаабытын кэнниттэн ыйытыылар киирдилэр. Саала иһэ толорута, дьон олоххо көхтөөҕүн туоһута буолла.

Аспаал суол оҥоһуллуо дуо?

«Олоҥхо ыһыаҕын көрсө улуус иһинэн аспаал суол оҥоһуллара былааннаммыта. Хантараак түһэрсиллэн 25  мөлүйүөн солкуобай көрүллүөхтээҕэ, оттон бу соторутааҕыта ол үп көрүллүбэт буолбут диэн сурах кэллэ, бу чахчы дуо?» — диэн ыйытыыны Константин Белоусов, суол хаһаайыстыбатын үлэһитэ ыйытта.

Бу мөккүөрдээх ыйытыыны Тырааныспар миниистирин солбуйааччы Алексей Филиппов сугулаан кэннэ сүбэлэһиэх буоллулар. Суол тутуллуоҕа диэн мэктиэ тылларын биэрдилэр.

Тоҕо дьадаҥытык олоробутуй?

«Субсидиялаах билиэттэр тоҕо суохтарый, мин биэнсийэм 13700 солкуобай. Биһиги баайдаах өрөспүүбүлүкэҕэ олорон, тоҕо наһаа дьадаҥытык олоробутуй? Холобур,  Дьокуускайга көрдөрүнэ барарбар сөмөлүөтүнэн көтөрбөр кэлэ-бара 30 тыһыынча солкуобай наада, маннык кыра биэнсийэҕэ киһи сатаан иитиллэн олорор кыахтаах дуо, тиийинэн олоруу орто кээмэйэ 16500 cолкуобайга тэҥнэһэр дииллэр да, ыйдааҕы биэнсийэ туохха да тиийбэт«, — диэн Өлүөхүмэ олохтооҕо бар дьон аатыттан санаатын  үллэһиннэ.

Бу бар дьону долгутар ыйытыыга Владимир Солодов маннык эппиэти биэрдэ:

— Эһигини кытта сөбүлэһэбин. Чахчы, тас дойдуттан хаалан иһэбит. Итиччэ кыра биэнсийэҕэ киһи сатаан иитиллэр кыаҕа суох. Оттон сөмөлүөтүнэн өрөспүүбүлүкэ иһинэн көтүүгэ субсидияламмат, тоҕо диэтэххэ федеральнай бүддьүөттэн чэпчэтии көрүллүбэт. Бу кыһалҕаны балаҕан ыйыгар ыытыллыахтаах форумҥа туруорсуохпут.

Ульяна  ЗАХАРОВА, edersaas.ru

Следите за самым важным и интересным в Telegram-канале и WhatsApp-группе ЯСИА
0
0