Арассыыйатааҕы Ийэ күнүн көрсө Дьокуускайдааҕы социальнай харалта уонна үлэ Управлениетыгар 10000 нүөмэрдээх «Дьиэ кэргэн» өрөспүүбүлүкэтээҕи ийэ хапытаалын сэртипикээтин элбэх оҕолоох Екатерина, Андрей Борисовтарга туттардылар.
Үсүһүн оҕоломмут Борисовтарга элбэх оҕолоох ыал саҥа (икки төрөппүт хаартыскалаах) дастабырыанньатын уонна 10000 нүөмэрдээх сэртипикээти туттардылар. Салайааччы Семен Матвеев дьиэ кэргэҥҥэ доруобуйаны, этэҥҥэ буолууну баҕарда.
Тоҕус сыл иһигэр өрөспүүбүлүкэтээҕи ийэ хапытаалын сэттэ тыһыынчаттан тахса дьиэ кэргэн туттубут. Ыаллар олорор усулуобуйаларын тупсарбыттар, тырааныспар ылыммыттар, оҕолорун үөрэхтэрин төлөөбүттэр.
