Ааспыт нэдиэлэҕэ Эбээн-Бытантай улууһугар Эстрада государственнай театрын артыыстара кэлэн бары нэһилиэктэргэ сылдьан, күҥҥэ иккилии кэнсиэри туруоран дьону-сэргэни улаханнык сэргэхситтилэр.
Александр Бурнашев, Сахаайа — Владлена Бурнашева, Аскалон Павлов, Анастасия Готовцева, Галина Попова, Алена Яковлева, эдэркээн ырыаһыт Иннокентий Лебедев ырыаларын көрөөччүлэр ытыс дохсун тыаһынан көрүстүлэр. Маннык элбэх, бэйэлэрэ туһунан ааттаах-суоллаах «сулустар» ыраах сытар кыра улууска биирдэ кутулла түспүттэрэ дьону-сэргэни соһутта да, үөртэ да. Ис сүрэхтэн тахсар ырыаларын тыллара уһун тымныы кыһын кэнниттэн хас нэһилиэк ахсын иһиллибитэ сааскы серенада буолан кутулунна. Артыыстар толорууларын таһыма үрдүгэ, дьоҥҥо истиҥ сыһыаннара хоту дойду дьонун дууһатын кылын таарыйан хас кэнсиэр ахсын дьон саалаҕа баппат гына толору мустан махталларын ытыс тыаһынан тиэртилэр. Маны таһынан ырыаһыттар Кустуур нэһилиэгэр сылдьан «Дьүрүһүй, икки тыллаах хомуһум!» ырыа күрэҕэр дьүүллүүр сүбэҕэ үлэлээтилэр, сүбэ-ама биэрдилэр. Кинилэр: «Өрөспүүбүлүкэ араас муннуктарын кэрийдибит да тыыннаах куолас эриэккэһэ, ырааһа манна баар эбит!» -диэн эппиттэрэ эдэр ырыаһыттарга алгыс буола иһилиннэ, инникигэ кынаттаата.
Бу иннинэ кулун тутар ыйга Былатыан Ойуунускай аатынан Саха академическай театрын артыыстара кэлэннэр эмиэ бары нэһилиэктэргэ сылдьан «Лоокуут уонна Ньургуһун», «Наара суох» испэктээкиллэри туруоран дьон-сэргэ биһирэбилин ылбыттара. Ыраах сытар улуус дьоно барыта киин куоракка тиэстэр кыахтара суох, ордук саастаах дьон тэлэбиисэргэ эрэ көрөр, араадьыйаҕа эрэ истэр ааттаах-суоллаах артыыстара маннык кэлэн гастроллаан баралларын олус сэргээтилэр, астыннылар. Артыыс үрдүк оруола – ырааҕыттан-чугаһыттан тутулуга суох культурнай, сырдатар, духуобунай үлэни маннык киэҥник ыыталлара кинилэри норуокка чугаһатар. Бэл былыр Өксөкүлээх хоту улуустары барытын атынан, ууннан сылдьан кэрийэн Бытантай үрэх алын тардыытыгар Сэлээбиргэ борохуот аалынан айаннаан иһэн кытылга тохтоон олохтоох олоҥхоһуттары истэн, сурунан ааспыттаах диэн кырдьаҕастар кэпсииллэр. Маннык кэрэ көрсүһүүлэр инникитин да салҕана турдуннар!
