«Кыайыы 50 сыла» спортивнай комплекска художественнай гимнастикаҕа күрэхтэһии буолла. Бөлөҕүнэн кыттыыга Саха сирин сүүмэрдэммит бастакы хамаандата мээчиктээх ньүөмэринэн финалга таҕыста.
Норуоттар икки ардыларынааҕы категориялаах кылаабынай судьуйа, Россия үтүөлээх тренерэ Татьяна Грибкова Саха сирин спортсменкаларын ньүөмэрдэрин көрөн баран, күрэхтэһиигэ үчүгэй бэлэмнээхтэрин бэлиэтээтэ. Ол курдук, Саха сирин сүүмэрдэммит бастакы хамаандата бөлөҕүнэн мээчиктээх ньүөмэригэр 14.717 баллы ылан үһүс бириистээх миэстэҕэ таҕыста. Бу көрдөрүү финалга киириини мэктиэлиир.
«Саха сирин хамаандата улаханнык үөртэ. Кыргыттарга, арааһа, төрөөбүт төрүт айылҕалара көмөлөстө быһыылаах. Онуоха кинилэри хара саҕаланыаҕыттан ыалдьааччылар, көрөөччүлэр күүскэ өйөөтүлэр. Онно тирэҕирэн гимнасткалар ньүөмэрдэрин үрдүк таһаарыылаахтык толордулар уонна ол түмүгэр финалга таҕыстылар. Сарсын да көрдөрүү үчүгэй буоларыгар эрэнэбин», — диэтэ кини.
Финалга Казахстан сүүмэрдэммит хамаандата (15,450), Сибиирдээҕи федеральнай уокурук (15,400), Саха сирэ (бастакы хамаанда 14.717), Ураллааҕы федеральнай уокурук (14,533) уонна Москва (14,467) хамаандалара киирсэллэр.
«Сыралаһыы түмүгүнэн чахчы дьоһуннар хааллылар. Онон күрэхтэһии олус сэргэх, интэриэһинэй уонна сытыы буолуо», — диэтэ Татьяна Грибкова.
Бүгүҥҥү күҥҥэ финалистары сэргэ өссө Уһук Илиннээҕи федеральнай уокурук, Монголия, Кытай уонна Саха сирин сүүмэрдэммит иккис хамаандата кытыннылар. Кыра баллы ылбыттар сарсыҥҥы түмүк күрэхтэһиигэ киирсибэттэр.
