19 От ыйа 19.07
  • 17°
  • $ 87,88
  • 96,1

Улахан Аан нэһилиэгин туһаайыытынан Өлүөнэ эбэҕэ сордоҥу үөскэтэллэр

13:03, 08 июня 2020
Текст:
Читайте нас на
Яндекс Новости
ЯДВ

Хаҥалас улууһун Улахан Аан нэһилиэгэр Өлүөнэ эбэҕэ 280 000 сордоҥ балык ыаматын ыыттылар. Тэрээһиҥҥэ «Росрыболовство» Ленатааҕы территориальнай управлениета, «Главрыбвод» Дьокуускайдааҕы филиала, Соҕурууҥу Уөһээ Дьааҥытааҕы хайа баайын хостурр хампаанньа (Полиметалл), «Янзолото» тэрилтэ үлэһиттэрэ кытыннылар.


Улахан Аан нэһилиэгэр Өлүөнэ эбэҕэ 280 000 сордоҥ балык ыаматын ыытыыга кыттыыны ылбыт сүрүннүүр исписэлиистэр санааларын үллэһиннилэр.

Екатерина Федорова, «Росрыболовство» Ленатааҕы территориальнай управлениетын балыктааһыны тэрийии, челугэр туhэрии уонна олохсуйар сирин харыстыырга үлэлэһэр салаатын начаалынньыгын солбуйааччы:

— Кэнники сылларга Саха сиригэр бары эйгэҕэ үлэ-хамнас үгүстүк ыытыллар буолла, чуолаан ууга сыһыаннаах үлэ. Уу эйгэтигэр харыстабыллаахтык сыһыаннаһыы үлэтин ыытар тэрилтэлэр хайаан даҕаны биһиэхэ кэлэн, бырайыактарын саҕалыахтарын иннинэ сөбүлэһиннэриэхтээхтэр. Бырайыак докумуоннарын кытта балыкка төһө хоромньу аҕалалларын ыйыахтаахтар, ол хоромньуларын толуйар буоллахтарына, биһиги сөбүлэҥмитин биэрэбит. Быйылгы былаан быһыытынан Саха сиригэр 35 мөлүйүөнтэн тахса балык ыаматын ыытар сорук турар. Быйыл ыам ыйыгар Ленскэй оройуонугар күндүөбэй, бэс ыйыгар Хаҥалас улууһугар сордоҥ ыамата ыытылынна. Барыта холбоон 4,5 мөлүйүөнтэн тахса балык ыамата ыытылынна. Балык ыаматын ханна ыытары наука үлэһиттэрэ чинчийии түмүгүнэн быһаараллар. Ханнык улуус сиригэр балыгы ыытары наука үлэһиттэрин ыйыыларынан оҥоробут.

Владимир Захаров, эколог, Соҕурууҥу Уөһээ Дьааҥытааҕы хайа баайын хостуур хампаанньа (Полиметалл) айылҕа харыстабылыгар сүрүннүүр исписэлииһэ:

— Томпо улууһугар Нежданинскай учаастагар комбинат тутулла турар. Бу тутуу бырайыагын чэрчитинэн, «Росрыболовство» сөбүлэҥинэн, ууга, балыкка оҥоһуллуон сөптөөх хоромньуну хайаан да төлүөхтээхпит. Хаҥалас улууһун Улахан Аан нэһилиэгин аттыгар баар күөлгэ 280 000 тахса сордоҥ ыамаларын ыыттыбыт. Кэлэр ыйга хатыыс ыамаларын ыытары былаанныыбыт. Айылҕа харыстабылыгар ыытар үлэбит эһиилги былаана оҥоһулунна. Хаһаайыстыбаннай үлэбитин «Росрыболовство», «Росприроднадзор», бары хонтуруоллуур тэрилтэлэр, уопсастыба нөҥүө дьэҥкэтик, сокуону, бары ирдэбиллэри тутуһан туран үлэлиибит.

Айылҕаны чөлүгэр түһэрэр үлэ былаан быһыытынан сыллата барар. Балык ыаматын ыытан, бу көрүҥү дэлэтэр сыаллаах үлэ өрөспүүбүлүкэҕэ сыаллаах бырагыраама буолар.

Следите за самым важным и интересным в Telegram-канале и WhatsApp-группе ЯСИА
Тутаах тыллар