Томпо оройуонун бары бөһүөлэктэриттэн уонна сэлиэнньэлэриттэн элбэх киһи Анал байыаннай дьайыыга сылдьар. Кинилэргэ уочараттаах гуманитарнай көмөнү илдьэн биэрдилэр.
Анал байыаннай дьайыыга сылдьар уолаттарга ыытарга, атыылаһарга анаан оройуон олохтоохторо уонна атын сиргэ үлэлиир биир дойдулаахтарбыт эрдэттэн бэлэмнэнэн кыах-күүс тиийэринэн көмөлөһөллөр. Кинилэр ортолоругар улахан тэрилтэлэр салайааччылара, тыыл, үлэ бэтэрээннэрэ уонна оскуола, уһуйаан оҕолоро бааллар. Маннык бары ылсан уолаттарбытын ыраахтан да буоллар араҥаччылыыбыт, дойдуларыгар этэҥҥэ эргиллэн кэлэллэригэр баҕарабыт.
«Томпо оройуонун суһал добровольческай штаба, волонтердар, оройуон олохтоохторо гуманитарнай көмөнү оҥорорго харчы хомуйан көмөлөспүттэрэ. Ол курдук хас муниципальнай тэриллии аайы атыы дьаарбаҥкатын ыыппыттара, биир күннээх хамнастарын биэрбиттэрэ.
Томпо оройуонун бюджетыттан 2 993 450 солкуобай, «Теплай Ключ нэһилиэгэ» бюджетыттан 949 900 солкуобай көрүллүбүтэ. «Саха Өрөспүүбүлүкэтин сэрии, үлэ, Сэбилэниилээх күүстэр уонна быраабы харыстыыр уорганнарын бэтэрээннэрэ (биэнсийэлээхтэрэ)» уопсастыбаннай тэрилтэ Томпо оройуонун салаатыгар олохтоохтор хомуйбут, куннээҕи хамнастарын ыыппыт пуондатыттан 2 899 943 солкуобай барбыта.
Дизельнэй генераторы, үс араас көрүҥ алта квадрокоптердары, икки тепловизорнай прицелы, дроннары булар түөрт прибору, икки араас көрүҥ рацияны, дальномеры, үс матассыыкылы, икки электрическэй бэлэсипиэти, 10 утуйар мөһөөччүгү, 30 дронтан көмүскүүр суорҕаны уонна да элбэх туттуллар малы атыыласпыппыт.
Оройуон волонтердара баайбыт маскировочнай сиэккэлэрин, наскылары, атыыласпыт эмтэрин, Дьабарыкы Хайа бөһүөлэгин уонна Охотскай Перевоз сэлиэнньэтин олохтоохторо хомуйбут илимнэрин, оҕолор оҥорбут суруктаах открыткаларын уонна харысхалларын илдьибиппит.
Дьокуускай куоракка олорор уонна үлэлиир биир дойдулаахтарбыт улахан көмөнү оҥороллор. Саха Өрөспүүбүлүкэтин «Комдрагметалл» генеральнай дириэктэригэр, Томпо оройуонун Бочуоттаах олохтооҕо Александр Егорович Кычкиҥҥа сырыы аайы делегация айанныырыгар сөмөлүөт билиэттэрин атыылаһан биэрэрин, оттон Новоазовскайга баар Саха сирин тирэх пуунугар сөмөлүөтүнэн, массыынанан ыытыллыбыт маллары тиэрдэргэ тэрийэр, ЛНР, ДНР, Белгородскай уонна Курскай уобаластарга сылдьарбытыгар арыаллыыр дьонунан хааччыйар «Донбасска көмөлөһөр Хотугулуу-Илиҥҥи пуонда» дириэктэригэр Георгий Сергеевич Куркутовка Томпо оройуонун дьаһалтатын аатыттан (баһылык Степанов Яков Иннокентьевич) улахан махталбытын тиэрдэбит.
Биир дойдулаахтарбыт «Сахатранснефтегаз» АО генеральнай дириэктэрэ Алексей Засимович Колодезников уонна «ДЭП 135» АУо генеральнай дириэктэрэ Александр Иннокентьевич Свинобоев биирдии погрузчигы биэрдилэр. Ону таһынан УАЗ уонна «Нива» массыыналары атыылаһыллыбыта. Биир погрузчигы биир дойдулаахпыт сулууспалыыр чааһыгар тиэрдиллибитэ. Атыттарын «Донбасска көмөлөһөр Хотугулуу-Илиҥҥи пуонда» илдьиэҕэ. «Драгоценности Якутии» ХЭТ генеральнай дириэктэрэ Чекуров Аркадий Николаевич электрическэй эрбиини уонна биэс саха быһаҕын, оттон «Түүлээҕи атыылаһар киин» ХЭТ генеральнай дириэктэрэ Егор Прокопьевич Андросов балык илимнэрин биэрдилэр. Кинилэргэ Томпо оройуонун дьаһалтатын аатыттан улахан махталбытын тиэрдэбит.
Уолаттарбыт дойдуларын аһын ахталларын иһин Чокуурдах ыыһаммыт балыгын, «Түмэн» СХПК эт оҥоһуктарын, Хатас агрооскуолатын пакеттаах собо миинин, таба уонна убаһа эттэрин, уомул балык кэнсиэрбэлэрин, барыанньалары уонна сироптары эрдэттэн үлэһэн атыыласпыппыт. Хас биирдии баһыылкаҕа саха быһаҕын укпуппут.
Уолаттарбытын бэйэлэрин көрсө, кэпсэтэн билсэ сатаатыбыт. Барыта 31 байыаһы, ол иһигэр ДНР — 20 байыаһы, ЛНР – 7 байыаһы, Ростовка уонна Курскайга – иккилии байыаһы көрүстүбүт. Үгүстэр бойобуой сорудахха сылдьаллар, ол эрээри үлэхтээх сирдэргэ доҕотторун, бииргэ сулууспалыыр дьоннорун ыыппыттара.
