Таатта улууһун Алдан нэһилиэгэр саха суруйааччыларыгар Николай Денисович уонна Анна Денисовна Неустроевтарга аналлаах сквер аһылынна. Сквергэ Неустроевтар пааматынньыктара, кинилэр айымньыларынан скульптуралары оҥорон туруордулар.
Неустроевтар пааматынньыктарын скульптор Василий Сивцев боруонсаттан кутан оҥордо. Сквер аһыллар күнүгэр киниэхэ СӨ искусствотын үтүөлээх диэйэтэлэ ааты иҥэрдилэр.
Сквергэ Николай Неустроев «Балыксыт», Анна Денисовна «Тиргэһиттэр» кэпсээннэринэн скульптуралары туруордулар. Маны Д.Г. Постников айар бөлөҕө оҥордо.
Ыспыраапка: Неустроев Николай Денисович — саха литэрэтиирэтин төрүттээбит суруйааччылартан биирдэстэрэ, драматург уонна прозаик. Кини балта Неустроева Анна Денисовна оҕо суруйааччыта, сахаттан бастакы дьахтар суруйааччы, ССРС суруйааччыларын сойууһун чилиэнэ, фольклору хомуйааччы, общественнай диэйэтэл. Неустроевтар Таатта улууһугар төрөөбүттэр.
