Санкт-Петербург куоракка «Традиции народов Якутии» I регионнар икки ардыларынааҕы бэстэбээл киэҥ далааһыннаахтык буолан ааста. Тэрээһини дойдубут култуурунай киинигэр олорор Мария Прокопьева салалтатынан «Ахтылҕан» сахалар түмсүүлэрин кыттыылаахтара тэрийэн ыыттылар. Көрсүһүү Аан дойдуга Баҕа өттүнэн көмөлөөх буолуу, Арассыыйаҕа Норуоттар сомоҕолоһууларын, Саха Сиригэр Култуура сылларыгар, ону таһынан Төрөөбүт тыл уонна сурук-бичик күнүгэр ананан ыытылыннылар.
Тэрийээччилэр дьону түмэ тардар, саха баай култууратын киэҥ араҥаҕа билиһиннэрэр, регионнар икки ардыларыгар доҕордуу сыһыаны олохтуур, сомоҕолоһуу, баҕа өттүнэн көмө оҥоруу итиэннэ үтүө дьыала тула түмсүү кыаҕынкөрдөрөр баҕа санаалара РФ Президенин иһинэн Саха сирин бэрэстэбиитэлистибэтин, Петербург Выборгскай оройуонун дьаһалтатын, «Дом национальностей», Саха Сириттэн Варвара Обоюкова салайааччылаах «Северный колорит» тэрилтэ, үгүс общественнай түмсүүлэр өйөбүллэринэн олоххо киирдэ.
Бэстэбээли сахалыы дьиҥ төрүт үгэһинэн Матрена уонна Афанасий Филипповтар алгыстаах тылларынан арчылаан, төрөөбүт түөлбэбит эмтээх отторунан сыт таһааран арыйдылар. Сааланы толору мустубут ыалдьыт бары биир турукка киирэн, Үөһээ Айыылартан алгыс ылан ыраастанныбыт.
Тэрээһин хас эмэ хайысхаҕа арахсан ыытылынна. Эрдэттэн култуура киинин араас муннуктарыгар анал аралдьытыылар буоллулар. Киин сценаҕа айар талааннаахтар фольклорга куонкурустара, фойеҕа уран тарбахтаахтар быыстапкалара, хабылыкка-хаамыскаҕа, хомус тардыытыгар, муос оҥоһуктарга уонна да араас маастар-кылаастар, саха аһын мааны сандалыта, тоҥ балык дегустацията тэрилиннэ.
Туспа саалаҕа «Өбүгэ үгэстэрин утумнааһын» хайысхаҕа санаа атастаһыыта, «Чэгиэн турук үгэстэрэ» тула кэпсэтии ыытылынна.
Кыттааччылар географиялара сөхтөрдө. Ол курдук бэстэбээлгэ анаан-минээн Сахабыт сирин араас улуустарыттан: Тааттаттан, Уус-Алдантан, Чурапчыттан, Намтан, Хаҥаластан, Дьааҥыттан, Муоматтан, Бүлүүттэн ону таһынан Санкт-Петербургтан, Ленинградскай уобаластан, Архангельскай уобаластан, Чукотка кыраайыттан, Францияттан, онтон да атын регионнартан айар талааннаахтар кэлэн бэйэлэрин билиһиннэрдилэр, баай уопуттарын кытта үллэһиннилэр.
Күн устата истиҥ көрсүһүүлэр, сылаас кэпсэтиилэр, саҥа билсиһиилэр буоллулар. Биир да ыалдьыт чуҥкуйан турбакка, ханна санаата уурарынан көрдө-иһиттэ, сынньанна, сөхтө-махтайда. Барыта түөрт сүүсчэкэ киһи бэстэбээлгэ сырытта, кытынна, алтыста.
Онон тэрийээччилэр — Петербурга олохсуйбут саха мааны далбардара ийэлии дьону түмэ тардар баҕа санаалара олоххо киирбитинэн истиҥник эҕэрлэлиибин уонна бу курдук истиҥ-иһирэх уонна дириҥ суолталаах көрсүһүүлэр үтүө үгэскэ кубулуйалларыгар баҕа санаабын тиэрдэбин.
Анфиса Слепцова,
РФ суруналыыстарын Сойууһун чилиэнэ,
Санкт-Петербург к.
